Unom ka durugista sikop sa drug operations

CEBU, Philippines — Unom ka durugista sikop sa drug operations

Nikabat sa P136,000 nga kantidad sa shabu ang nasakmit  atol sa buy bust  operation sa kapolisan sa Presinto 5 sa MCPO niadtong Huwebes sa gabii diha sa Barangay Looc, Dakbayan sa Mandaue.

Nasikop sa maong operasyon ang suspetsadong pusher nga si Daniel Benavente, hingkod ang panuigon, taga Dakbayan sa Sugbo. Si Benavente giingong nasakmitan kini og 20 ka gramong shabu ug laing lima ka paketeng shabu nga nikabat tanan sa nahisgutang kantidad.

Sa laing bahin, duha ka suspetsdong pusher ang nasikop atol sa gipahigayon nga operasyon batok sa ginadiling drugas sa City Intelligence Branch sa Cebu City Police Office diha sa Barangay Luz, Dakbayan sa Sugbo niadtong Huwebes sa hapon.     Ang mga suspetsado mao sila si Ariel Sala, 38, ulitawo, residente sa maong lugar ug Menard Resurreccion, 18, taga Barangay Carreta ug parehong nalakip sa station level watch list ug nasakmitan og 10.28 gramos nga shabu nga nibalor tanan ngadto sa P70 mil ug buy bust money.  Samtang sa Dakbayan sa Talisay nasikop sa kapolisan sa siyudad diha sa Barangay Tanke kagahapon sa buntag  si Joseh Ytang, 19, nga taga Barangay San Roque sa maong siyudad ug nasakmitan og shabu nga nitimbang ngadto sa 6.39 gramos nga nibalor og P43,452. aing nasikop ang ig-agaw ni Joseh nga si Jeffrey Ytang, 35, residente usab sa Barangay San Roque ug nakuhaan usab og shabu nga nitimbang ngadto sa 3.51 gramos nga nibalor og P23,868.

Lakip sa nasikop si Eugene Nunez, 35, usa ka mananagat mga nag-sideline sa pagpamaligya og ilegal nga drugas ug nasakmitan kini og 0.36 gramo nga shabu nga nibalor og P2,448. – Romeo T. Limpangog, Rowena D. Capistrano ug Gabriel C. Bonjoc/BDB

Paghawan sa sidewalk dakong hagit sa opisyales

Giisip sa presidente sa Association of Barangay Council (ABC) nga dakong hagit alang sa opisyales sa barangay ang kamandoan sa Department of Interior and Local Government (DILG) sa paghawan sa mga ilegal nga estraktura diha sa kadalanan.

Si Kapitan Josefina Consial, ABC president nagkanayon nga dakong trabaho kini nila sa pagpasabot sa katawhan nga ang ilang buhaton mao ang pagtamod lang sa ilang trabaho diin mando usab kini sa ahensiya nga nagdumala kanila.

Ang opisyales sa barangay gihatagan og tagal nga 75 ka adlaw sa pagpatuman sa kamandoan.

Matud ni Consial nga mas maayo nga naa sila’y tamdanan sa kamandoan sa DILG aron ilaha usab kining ipasabot ngadto sa mga tawo.

Giklaro ni Consial nga wala na kinahanglana nga maghimo og resolusyon ang ABC diin sila nag-iyahay og suwat ngadto sa DILG labot sa kamandoan.

Giingong adunay mga barangay nga wala maglisod sa pagpatuman sa kamandoan tungod kay dako pa og hawan ang ilang lugar o menos ang ilang suliran kabahin sa estraktur diha daplin sa karsada.

Adunay mga barangay usab ang nagproblema diin adunay mga panimalay nga gipantukod sa ilang lugar nga nikawat sa luna nga gipanag-iya sa gobiyerno o sidewalk. /BDB (BANATNEWS)