Traslacion 2020 hapsay ra

CEBU, Philippines — Gihulagway sa Police Regional Office 7 nga hapsay ug malinawon ang Walk with Mary lahos na sa Traslacion sayo kagahapon sa buntag.

Matud ni PRO-7 Director, Police Brigadier General Valeriano De Leon, nga walay natala nga insidente ang kapolisan atol sa kalihukan sa simbahan.

Gibanabana nga moabot sa 300,000 ka deboto ang niuban sa Walk with Mary samtang 3,000 ang niuban sa Traslacion.

Gikan sa Our Lady of Guadalupe Parish nagsugod og lakaw ang uban samtang daghan sab ang nibagat na sa Fuente Osmena Rotunda paingon sa Basilica Minore del Sto. Niño.

Gipahigayon ang Santos nga Misa ug gisundan ang Traslacion gikan sa Basilica padulong sa National Shrine of St. Joseph sa Dakbayan sa Mandaue.

Matud ni Fr. Eligio Suico sa parokya sa Our Lady of Guadalupe sa iyang wali nga ang tawo wala maglakaw nga mag-inusara ug anaa ang ilang mga kabanay hinungdan angayan pasalamatan ang tanan nga gasa nga madawat ilabi na ang gasa sa pamilya.

Human sa Santos nga Misa gisunod ang Traslacion agi sa pipila ka kadalanan sa Dakbayan sa Sugbo uban sa mga opisyal nga gipangulohan ni Cebu City Mayor Edgardo Labella ug gisugat kini sa may Barangay Banilad, Dakbayan sa Mandaue nga gipangulohan ni Mayor Jonas Cortes.

Usa ka 60-anyos nga si Ellain Heyrosa nga taga Barangay Opao, Dakbayan sa Mandaue, nitug-an nga daku kaayo ang ilang pasalamat ni Senyor Santo Nìno tungod sa mga grasya nga ilang nadawat ug kanunay sab maayo ang ilang panglawas bisan sa iyang pangedaron.

Sayaw sa Sinulog ug pagsabwag og pongpong sa mga buwak uban ang pagkaway-kaway sa mga kamot ang gihimo sa liboan ka mga deboto nga giagian sa imahen sa Senyor Sto. Niño ug sa Birhen sa Guadalupe.

Nahidangat ang motorkada sa National Shrine of Saint Joseph alas 8:45 sa buntag kagahapon.

Gisugdan gilayon ang pagpahalok sa naglinya nga mga deboto human sa pagpahimutang sa mga imahen kuyog na Senyor San Jose ug nahiusa ang Sagrada Familia.

Higpit nga gipatuman sa kapolisan ang kahapsay sa gawas ug sulod sa simbahan nunot usab sa ilang pag-awhag sa paglinya ug paghinayhinay og irog hangtud sa paghidangat na sa ilang paghalok ngadto sa imahen.

Si Monsenyor Antonio Medida nga maoy assistant moderator sa National Shrine of Saint Joseph nipasabot nga ilang gihimo ang pagpahalok sa mga deboto ngadto sa Sagrada Familia bisan atol sa mga oras sa nagmisa.

Mahibalik sa Basilica ang imahen sa Senyor Santo Niño ug Birhen sa Guadalupe human sa fluvial procession karong buntag nga manukad sa Dakbayan sa Lapu-Lapu hangtud sa Pier 1 sa Dakbayan sa Sugbo. /GMR (BANATNEWS)