Mas daghan moapil sa fluvial

CEBU, Philippines – Gibutyag sa Philippine Coast Guard 7 nga mas daghan karong ang moapil sa fluvial procession karong Sabado nga moabot sa 146 ka passenger motorbanca ug passenger vessels base sa narehistro sa ilang buhatan.

Nasayran nga sa niaging tuig naa lang sa 90 ka sakyanan ang niapil.

Ang mga nagparehistro naglangkub sa Division 1- 15 GT and above o ship size vessel adunay 33; Division 2- 3GT to 15 GT passenger type motorbanca 96; Division 3- 3GT and below o gitawag nga small type motorbanca adunay 17 nga moabot tanan ngadto sa 146.

Matud sa tigpamaba sa PCG-7, Lt. Junior Grade Michael John Encina, nga nakuratan sila sa kadaghan sa nagparehistro.

Niadtong Martes ang deadline sa pagparehistro ug sigun ni Encina nga wala nay lugway nga mahitabo base sa guideline nga gipagawas sa ilang Task Unit Maritime Commander Rodolfo Dela Peña Jr.

Duna lang sila’y gidawat kagahapon sa buntag kinsa duna nay mga special permit tungod kay nabayran naman nila sa Maritime Industry Authority.

Niadtong Martes sab nagpahigayon og meeting ang PCG sa mga participating maritime stakeholders, operators ingon man sa mga kapitan sa barko alang sa safety ug security guidelines, kun unsay mga do’s and don’ts atol sa fluvial procession lakip na ang pagtuman sa embarkation ug disembarkation guidelines.

Adunay CG inspectors ang magbantay atol sa embarkation sa mga pasahero aron maseguro nga kadtong mga gidili sama sa ilimnong makahubog ug balloons malikayan.

Ang CG andam na tanan sa ilang kahimanan sama sa komunikasyon sa fluvial procession.

Napahigayon na sab ang dry-run sa fluvia procession niadtong Lunes diin niabot lang sa dul-an usa ka oras ang biyahe maong sa adlaw na gyud sa kalihukan pahinayan nila ang dagan sa galleon.

“Mga final guidelines nalang that will be provided sa amin as Coast Guard personnel will be disseminated on January 17 ng gabi, lahat kami dito will be accumulated and gathered up for the final briefing and final say ng ating District Commander si Commodore Badajos,” matud ni Encina.

Si Encina niawhag sa mga moapil sa fluvial procession nga tumanon gyud ang mga guidelines nga gihatag ilabi na ang mga angay ug dili angay nga buhaton atol sa maong kalihukan. /GMR (BANAT NEWS)