Imbestigasyon sa OSC hapit na mahuman

CEBU, Philippines — Gikatakda na moduso sa ilang rekomendasyon ang Cebu City Legal Office ngadto sa buhatan ni Mayor Edgardo Labella bahin sa ilang imbestigasyon may kalabutan sa isyu sa Operation Second Chance human sulod sa duha ka higayon naeskapohan.

Matud ni City Legal Officer, Atty. Rey Gealon, nga ang ilang buhatan padayon pa karon nga nag-consolidate sa isyu may kalabutan sa imbestigasyon sa Operation Second Chance. Dugang pa ni Gealon nga sa nilabay nga semana ang mga respondents niduso na sa ilang legal position may kalabutan sa imbestigasyon.

Gihimakak sa mga respondents ang giingogn pagpabaya ug gibasol ang kakuwang sa resources sama sa personnel nga mobantay ug mo-secure sa mga residente sa pasilidad nga mga kabataan.

Gitug-an ni Gealon nga ang mga imbestigador motan-aw kung nganong wala gipaabot sa mga nagdumala sa pasilidad ang ilang concerns sa normal nga higayon ug nganong wala mohangyo sa ilang mga panginahanglanon ug gipaabot pa nga duna nay nieskapo.

Gibutyag ni Gealon nga gitan-aw pa karon ang sirkumstansiya kung manubag ba o dili sa maong panghitabo ang mga respondents. Si Gealon nitug-an nga walay napulo ka adlaw ang ilang buhatan sa CLO moduso og rekomendasyon sa buhatan ni Labella. /GMR (BANATNEWS)