Mandaue nangandam sa ‘panagtagbo’

CEBU, Philippines — Nahimo na nga tipik og kabahin sa kalihukan sa kapistahan sa Senyor Santo Niño ang panagtagbo sa Sagrada Familia gikan sa Siyudad sa Sugbo ug Siyudad sa Mandaue.

Ang panagtagbo ipahigayon buntag sa adlawng Biyernes, Enero 17, 2020 diin ang imahen sa Senyor Santo Niño kuyogan sa imahen sa Birhen sa Guadalupe aron mausa sila nga bilaran tubuok gabii sa simbahan sa Senyor San Jose sa Dakbayan sa Mandaue.

Nunot niini nahimo na usab nga tinuig nga kalihukan sa kagamhanan sa Dakbayan sa Mandaue ang pagpahigayon og Panagtagbo sa Sagrada Familia nga apilan sa mga deboto nga mga Mandauehanon.

Ang tulo ka imahen nga naglangkub sa Sagrada Familia iprosesyon kini subay sa dalan A. del Rosario sa Barangay Tipolo, dalan Sotero B. Cabahug sa Ibabao-Estancia ug dalan Catalino C. Ouano sa Barangay Looc sa Dakbayan sa Mandaue.

Sa kaadlawon sa adlawng Sabado, ipahigayon ang motorcade sa imahen ni Senyor Santo Niño ug Birhen sa Guadalupe paingon sa national shrine sa Birhen sa Regla sa Dakbayan sa Lapu-Lapu sa dili ang fluvial procession.

Si Lieutenant Junior Grade John Michael Encina nga maoy information officer sa Philippine Coast Guard sa Central Visayas niingon nga ang galleon sa fluvial procession adto manukad sa dunggoanan sa Naval Forces Central sa Barangay Looc sa Dakbayan sa Lapu-Lapu paingon sa Pier 1 sa Dakbayan sa Sugbo.  GMR (BANATNEWS)