Butane niulbo; 2 anyos lalaki grabe nga napaso

CEBU, Philippines —  Nakabaton og grabeng paso  sa iyang kalawasan ang usa ka 2 anyos nga batang babaye dihang nayab-an kini sa nagbukal nga tubig gikan sa kalderong dali untang gikuha sa amahan niini gikan sa gitak-angang butane stove nga kalit misilaob.

Nahitabo kini sa sulod sa giukopar nga stall nga nahimutang  sa satellite market  sa Barangay  Canduman  sa Dakbayan  sa Mandaue alas 4  pasado ang takna sa Lunes sa hapon.

Si Senior  Fire Officer One Wendell  Villanueva sa Bureau Fire Protection (BFP)  sa Dakbayan  sa Mandaue miila sa biktima nga mao si Arianne Nicole Sesdoryo, 2 anyos, kinsa nakabaton og  third degree burn.

Matud pa ni Villanueva nga nag-init og tubig ang amahan sa bata apan kalit lamang misilaob ang stove kay hungaw ang butane canister nga gigamit niini.  Dali niyang gihaw-as ang ininit apan nayabo hinuon kini sa lawas sa iyang anak.

Wala pa hinuon matino kun liquefied petroleum gas (LPG) nga illegal nga gi-refill sa disposable butane canister ang gigamit sa maong stove. Ang LPG nga gikarga sa mga lata sa butane gikonsiderar sa kabomberohan nga peligro ug gidili ang pagbaligya ug paggamit niini.

Ang mga tawo dali sab nga nitabang sa pagpawong sa kalayo maong wala kini mokatap. Ang bata daling gidala sa Eversely  Child Sanitarium General Hospital  ug gibalhin ngadto  sa Vicente Sotto Memorial  Medical  Center  sa Dakbayan sa Sugbo.  IBM (BANATNEWS)