50 pamilya nawad-ag mga panimalay

CEBU, Philippines — Mokabat sa 40 ka mga balay ang naugdaw human moigo ang sunog sa Sitio Bukog, Barangay T. Padilla sa Siyudad sa Sugbo sa luyo nga bahin sa T. Padilla Public Market. 

Nadawat sa kabomberohan ang alarma alas 9:54 Sabado sa gabii ug giisa dayon ngadto sa  Task Force Alpha nianang alas 10:32 sa gabii.

Sa pasiunang imbestigayon ni Fire Officer 2 Fulbert Navarro kini mitug-an sa mga tigbalita nga base sa ilang nakuhang impormasyon na-overcharge nga cellphone gikan sa ika-2 nga andana sa usa ka boarding house nagsugod ang sunog.

 Gibanabana nga miabot og P500 mil ang danyos sa maong sunog samtang nangapaso sila si Maria Villeñia, 80, nga nakaangkon og sa 3rd degree burns ug ingon man si Rene Abellana ,39, kinsa nakaangkon og 2nd degree burns ug parehong gitambalan sa mirespondeng Emergency Medical Service sa siyudad.

Matud ni Navarro, milanat og kapin sa usa ka oras ang kombate sa mga bombero tungod kay kasagaran sa mga balay ginama sa mga light materials.

Usa ka residente nga si Rodel miingon nga nakadungog kini nga daw adunay mibuto, ug sunod nga nakita niini ang pagdilaab sa maong balay. Apan miangkon kini nga dili sila sigurado kung diin gikan ang pagbuto.

 Giawhag usab ni Navarro ang katawhan nga likayan lang una ang pagpanguha sa mga nasunog nga wires sa fire scene sanglit nagpadayon pa sila sa ilang imbestigasyon pagsubay sa hinungdan niini. Sa kalamboan sa maong hitabo, ang pangulo sa Department of Social Welfare and Services sa siyudad, Dr. Jeffrey Ibones miingon nga kapin katunga sa mga biktima ang nipili nga di magpundo sa evacuation center nga giandam sa gobiyerno kay mas gusto nilang adto sila sa ilang stalls sud sa merkado.

“Ang mga nasunogan nay mga stalls sa merkado , nihangyo sila nga adto lang sila nga didto lang kuno sila mo stay,” matud ni Ibones.

Sa labing uwahi nilang ihap, 20 ka balay na ang ilang na validate nga hingpit gyud naugdaw , mokabat 50 ka pamilya ang naapektahan.

“So far mao lang na atong partial, mag validate pa ta kung tinuod ba gyud silang nasunogan,” si Ibones midugang.

Ikaduha na kini nga dakong sunog nga miigo sa Cebu City human sa 70 ka panimalay sab nga naugdaw sa Barangay Duljo-Fatima niining pagsulod sa tuig 2020. /IBM (BANATNEWS)