Oratio Imperata sa pagpamatay ipadayon

CEBU, Philippines — Gipahibawo ni Cebu Archbishop Jose Palma nga padayon gihapon ang Oratio Imperata sa pag-ampo sa paghunong sa pagpamatay sa Sugbo sa mga misa sa tanang parokya karong tuiga.

Kung mahinumduman ang Oratio Imperata unang gipagawas sa simbahan niadtong Agosto 2018. Ang Arsobispo nitug-an nga angayan gihapon nga ipadayon ang Oratio Imperata tungod kay dili tanan nga nangamatay sa mga nilabay nga tuig ang nakadawat na sa hingpit og hustisya sa ilang kamatayon.

Sumala pa ni Palma nga angayan ipadayon ang Oratio Imperata aron padayon gihapon ang damgo nga mahunong na ang pagpamatay.

Ang Arsobispo nakamatikod hinoon nga niubos ang kaso sa pagpamatay sa Sugbo sa katapusan bahin sa 2019 nga nagpakita sa kausaban sa kasing-kasing sa mga responsable sa nahitabong pagpamatay usa ka tuig kapin human gihimo ang pag-ampo.

Samtang ang chairman sa Commission on the Laity nga si Fe Mantuhac-Barino pabor sab nga ipadayon ang Oratio Imperata tungod kay daghan pa nga mga nagbangutan ang padayon pa nangita og hustisya.

Daku usab ang pagtuo ni Barino nga gitubag na sa Ginoo ang pag-ampo sa katawhan tungod sa namatikdan nga paghinay na sa patay sa Sugbo. – Rowena D. Capistrano/GMR

Hapon nag-diving sa Oslob nalumos

Patay ang usa ka hapon human nalumos sa kadagatan sa Barangay Tanawan, Lungsod sa Oslob.

Giila ang biktima nga si Marinobu Kuriyama, 59, kinsa matud ni Oslob Police Station chief, Police Captain Jade Sumugat, nga nagbakasyon ang tibuok pamilya niini isip pagselebrar sa holiday season.

Usa sa ilang gibisita ang butanding sa lugar nga gidayo sa mga langyaw nga turista.

Atol sa hitabo giingong nag-free diving ang biktima uban ang pipila sa iyang pamilya nga kauban.

Dugang pa ni Sumugat nga adunay tour guide nga kauban ang biktima samtang nag-free diving.

Nahibulong nalang ang mga kauban sa biktima tungod kay nadugay og saka sa ibabaw hinugdan nga ilang gisusi ug nakita nila nga naglisud pagbalik sa taas ug ilang gisawom ang biktima aron makuha.

Pag-abot sa ibabaw nga bahin dali kini nga gidala sa baybayon ug gitabang human nga adunay dugo nga nigawas sa ilong ug baba sa biktima.

Gani gisuwayan pa og luwas pinaagi sa cardiopulmonary resuscitation (CPR) ug nakadesider nga dalhon nalang sa tambalanan apan gideklarar nga dead on arrival ang biktima.

Gisusi sa kapolisan kung aduna bay pagkuwang ang tour guide sa pagbantay sa kaluwasan sa ilang kustomer. /GMR (BANATNEWS)