Sikyu nagpabuto’g armas pagsugat sa Bag-ong Tuig

CEBU, Philippines — Gitanggong  sa kapolisan sa Presinto  3  sa Mandaue  City  Police  Office (MCPO) ang usa ka gwardiya nga giingong hubog nga nagbantay  sa usa ka establisamento sa Sector  2,  Barangay Pagsabungan sa Dakbayan  sa Mandaue  human kini giingong nagpaboto  sa iyang armas sa pagsugat sa Bag-ong Tuig nga maoy hinungdan  sa pagkaangol sa usa ka babaye. Si  Police Staff  Sergeant  Jessie  James Galo, imbestigador  sa Presinto 3  sa MCPO  miila  sa suspetsado nga mao si Percy Sanico, 47, taga  Barangay  Lahug,  Dakbayan  sa Sugbo ug ang biktima nga nakabaton og samad pinusilan  sa iyang paa mao si Maria Luz  Millama, 25, nagpuyo sa condominium  nga  gibantayan sa sa suspek.

Matud pa ni Galo nga atol  sa paglanog  sa mga boto-boto sa ug pagsabasaba sa mga torotot pag-untop sa tungang gabii giingong nagpabuto sa gitangkil niyang armas nga kalibre 38  ang suspetsado tumong sa gikamada nga mga culvert  nga semento.

Apan naigo sa splinters ang paa ang biktima nga kauban  usab  sa iyang sakop  sa pamilya nga nagselebrar  sa pagsugat sa Bag-ong Tuig sa gawas sa ilang panimalay.

Si Galo  miingon  nga nahingangha na lamang  ang biktima nga nagkadugo na ang paa niini.

Dali  nga gidala  sa iyang sakop  sa pamilya  sa usa ka pribadong tambalanan  sa Dakbayan  sa Mandaue.

Ang suspek daling gipadakop ug sa dihang gipaubos sa liquor test nakainom kini og ilimnong makahubog. /IBM (BANATNEWS)