Aksyon Agad sa Talisay ipadayon
CEBU, Philippines — Magpadayon nga maglihok ang Aksyon Agad Team (AAT) ni mayor Gerald Anthony “Samsam” Gullas Jr. sa tuig 2020 human nakita ang kaepektibo niini pagtubag sa mga panginahanglan sa mga Talisaynon.
Ang AAT mahimong sangpiton panahon sa pagsugwak sa tubig kanal, basura, problema sa linya sa kuryenti ug uban pa.
Gani nakakuha man kini og daghang pagdayeg diha sa social media gumikan sa ilang kapaspas nga pagtubag.
Gawas niana, ipadayon sab sa mayor ang mga libreng serbisyo alang sa mga kabus diha sa Talisay City District Hospital.
Si Gullas adunay programa nga “womb to tomb” kun diin ang tawo nga lisod sa pagpatambal dili na mabalaka kay bayaran man kini sa dakbayan.
Gikan sa pagmabdos palang sa mga bata hangtud sa ilang kamatayon ini og abot sa panahon motabang ang siyudad ug daghan sa mga kabus ang natabangan sa maong programa.
Ang maong programa gigahinan sa dakbayan og pundo ug gipaabot nga mas daghan pa unya ang matabangan niini sa sunod tuig. /IBM (BANATNEWS)
- Latest
