Ahong, SKF nanghatag pinaskohan

CEBU, Philippines — Nikabat sa kapin 3,000 ka kabataan sa Dakbayan sa Lapu-Lapu lakip sa Isla sa Olango ang nisalmot sa Pasko sa Kabataan.

Kini gipasiugdahan sa buhatan ni Mayor Junard Ahong” Chan, Sangguniang Kabataan Federation president Laika Tampus ug giabagan sa pangulo sa Local Youth Development Office nga si Tristom Shaun Romero.

Gidalitan ang kabataan sa nagkadaiyang matang sa kalingawan uban sa pagpakigsawo sa giandam nga pagkaon ug gipanghatagan usab sila og mga pinaskohan nga naglakip sa biseklita, skate board ug uban pa.

Gitambayayungan ang Pasko sa Kabataan sa mga opisyal sa kabarangayan nga gipahigayon sa Hoops Dome sa mainland, ug sa Barangay Sta. Rosa sa Isla sa Olango.

Gihatagan usab ang maong mga bata sa nagkadaiyang kalingawan pinaagi sa picture taking, face painting ug magic shows uban usab sa makalingaw nga mga clowns.  GMR (BANATNEWS)