State of calamity ang daanbantayan, Medellin

CEBU, Philippines — Nirekomendar ang Provincial Disaster Risk Reduction and Management Office nga ipaubos sa state of calamity ang tibuok Lalawigan sa Sugbo human sa bagyong Ursula.

Kini human nideklarar na ang Lungsod sa Daanbantayan ug Medellin og state of calamity kagahapon.

“Base sa Republic Act 10121, usually if ang LGU declares a state of calamity, we have to have two or more LGUs, timing kaayo nga ang Daanbantayan ug ang Medellin nag-declare naman og state of calamity, that is sufficient enough for the Province to declare,” matud sa hepe sa PDRRMO nga si Neil Angelo Sanchez.

Matud niya nga iya pa kining irekomendar pinaagi PDRRM Council nga gipangulohan sa gobernador.

Kun aprobahan sa PDRRMC, iduso na usab kini ngadto sa Provincial Board alang sa pormal nga deklarasyon.

Gitug-an ni Gemma Ma. Villamor, local disaster officer sa Medellin, ngadto sa PDRRMO nga 1,116 ka balay ang partially damaged ug 36 ang totally damage gikan sa unom ka barangay.

Samtang sa Daanbantayan dul-an sa 50,000 ka tawo ang napabakwit tungod sa bagyo.

Matud ni Mayor Sun Shimura nga ang Barangay Tapilon pa lang daan anaa na sa 60 ka pumpboats ang naguba ug padayon pa ang pagkuha sa damage assessment sa mga balay ug ubang inprastraktura.

Ang Daanbantayan adunay P3.2 milyones nga calamity fund nga mamahimong magamit pag-ayuda sa mga apektado sa bagyo.

Samtang moabot sa 49,382 ka mga two o 9,947 ka pamilya ang napabakwit gikan sa dili momenus 10 ka lungsod ug dakbayan sa amihanang bahin sa Lalawigan sa Sugbo atol sa bagyo.

Lakip niini ang mga lungsod sa Isla sa Bantayan ug Camotes nga naagian sa bagyong Ursula.

Si Gobernador Gwendolyn Garcia mohimo og aerial ug site inspection sa norte karong adlawa.

Sa laing bahin naagpahigayon og relief operations ang Philippine Coast Guard pinaagi sab sa pagpakig-alayon sa PDRRMO ug Department of Social Welfare and Development ilabi na sa Isla sa Carnaza ug Malapascua sa Lungsod sa Daanbantayan.

“So yesterday afternoon nag-transfer tayo ng 2,800 relief boxes from DSWD-7 going dito sa barko natin sa BRP Suluan MRRV 4406 at kaninang madaling araw umalis na yung barko natin para ihatid itong mga relief goods na ito papuntang Malapascua at Carnaza Island in northern part ng Cebu,” asoy ni Lieutenant Junior Grade Michael Encina, tigpamaba sa PCG-7.

Kagahapon sa buntag sab nagpahigayon ang usa nila ka barko nga mao ang BRP Capones MRRV 4404 og maritime surface assessment subay gihapon sa bagyong Ursula.

Sa mga gustong mo-donate mahimong bisitahon ang Coast Guard website ingon man ang ilang Facebook account nga mao ang Visayas Command.

Sa mga buot motabang, mahimo ra sila motawag sa 09178427102 o sa [email protected] Isip kabahin sa iCare Campaign Plan, nagpabilin ang PCG-Central Visayas nga maoy responder bisan sa mga importante nga kalihukan sa tuig ug sa mas lisud nga sitwasyon. /GMR (BANATNEWS)