Pharmacist, Seaman, minors sikop sa drug busts

CEBU, Philippines — Usa ka pharmacists  nga akusado sa pagpatay pipila ka buwan na ang nakalabay ang nadakpan atol sa buy-bust operation kontra illegal nga drugas niadtong Domingo sa kaadlawon.

Ang suspek nadakpan sa usa sa duha ka mga operasyon sa kapolisan sa Dakbayan sa Sugbo nga niresulta sa pagkasakmit sa kapin P500 mil nga kantidad sa gidudahang shabu.

Ang unang operasyon gipahigayon sa dalan Tres de Abril sa Barangay Pahina San Nicholas kagahapon sa kaadlawon nga niresulta sa pagkasikop ni Ahron John Lucob Subingsubing, 18,  taga-Sitio Acasia, Barangay Duljo Fatima Cebu City.

Nakumpiska gikan kaniya ang 30 gramo nga gidudahang shabu nga dunay gibanabana nga kantidad nga P204 mil. Ang suspetsado giingong naapil sa watchlist sa ilang buhatan.

Matud pa ni San Nicholas Police Station Chief, Police Major Kenneth Paul Albotra sa pagsusi sa record ni Subingsubing, nasuta nga gipangita kini sa kasong pagpatay niini lang tuiga sa dihang nag-edad pa kini og 17 anyos ug nagduda silang drugas ang hinungdan niini.

Sa ikaduhang operasyon sa susamang adlaw diha sa Sitio Lawis, Barangay Pasil, nadakpan ang usa ka giingong pharmacist human nakuhaan og 50 gramo nga gidudahang shabu nga gibanabanang nagkantidad og P340,000.

Ang suspek naila nga si Mary Jean Borja Quitara, 30, taga Barangay T. Padilla Cebu City ug giingong usa kini sa listahan sa City Level Watchlist target.

 Sa pikas bahin, usa ka seaman ug tulo ka menor de edad ang lakip sa nasikop sa Oplan Linis Talisay nga gihimo sa kapolisan sa Dakbayan sa Talisay sa miaging gabii.

Sa operasyon gihimo sa Sitio Mananga 2, Barangay Tabunok nadakpan ang 16 anyos nga lalaki nga taga Barangay Lagtang nga giingong maoy tigbaligya og illegal nga drugas sa maong dapit.

Nadakpan sab ang kauban niining menor ug silang Johnny Paran, 24; Arnildo Bautista Villarino, 53; Niel Naling, 22; Steph Claude Bayabos, 23; ug Jonathan Manatad Pepito, 46. Nakuha gikan kanila ang shabu nga adunay balor nga P40 mil.

Sa sunod operasyon sa nahisgutan gihapong lugar nadakpan si Janrey Ebrado, 19, kauban ang menor de edad. Naapil sa gidakop ang usa ka seaman nga si Joeffre Larawan, 43, nga gidudahang nisuyop sa maong dapit uban nila ni Florencio Mañego, 25; Jerick Sabinico Pardillo, 38 ; Jake Michael Gomez, 20; ug Jemark Alcontin, 27.

Nakuha gikan sa maong operasyon ang usa ka medium pack ug 41 ka gagmay nga pinakete sa shabu nga mobalor kapin P27 mil. /IBM (BANATNEWS)