Notadong kawatan nasikop

CEBU, Philippines — Natingkagol sa detention cell sa Carcar City Police Station human masikop sa kapolisan sa Dakbayan sa Carcar niadtong Biyernes sa gabii diha sa Barangay Poblacion 1 sa nahisgutang siyudad ang giingong notadong kawatan pinasikad sa warrant of arrest sa tulo ka kaso niining pagpangawat.

Ang WOA batok kang Felix Viobor, 46, taga Sitio  Mananga 2, Barangay Tabunok, Dakbayan sa Talisay giluwawan ni Regional Trial Court (RTC) Judge Mory Nueva sa Branch 13, Dakbayan sa Sugbo; RTC Judge Ester Veloso sa Branch 6 sa Dakbayan sa Sugbo ug Municipal Trial Court in Cities (MTCC) Judge Carlos Fernando sa Dakbayan sa Mandaue.

Si Police Corporal Argie Noel Espinosa sa Carcar City Police Station nagkanayon nga posibleng nagtago-tago si Viobar diha sa Dakbayan sa Carcar.

Nasayran nga ang maong mga kaso batok kang Viobor napasaka kini sa korte niadtong tuig 2013.

Giingong gawas sa kasong pagpangawat nalambigit usab sa ginadiling drugas si Viobor. /BDB (BANATNEWS)