Hugaw nga tubig sa CCJ gireklamo

CEBU, Philippines – Ang Cebu City Environment and Natural Resources Office (CCENRO) nipahigayon na og tigom kabahin sa problema sa hugaw nga tubig gikan sa Cebu City Jail nga gireklamo sa mga residente diha sa lugar.

Si Attorney John Jigo Dacua, hepe sa CCENRO nagkanayon nga sukad niadtong buwan sa Agosto niining tuiga nagpahigayon na sila og technical conference tali sa kanhi warden sa CCJ nga si Superintendent Renante Rubio.

Ang Pollution Adjudication Board (PAB) niadtong Nobiyembre 27, 2019 nimando kini sa pagsirado sa discharge points ug tungod niini giingong niawas ang hugaw nga tubig gikan sa maong prisohan.

Matud ni Dacua nga uban sa Department of Public Service (DPS) kanunay nilang gikolekta ang hugaw gikan sa septic tank sa prisohan isip dinaliang solusyon sa maong problema.

Giingong ang nanobra nga gidaghanon sa mga piniriso ang usa sa hinungdan sa maong problema.

Si Dacua nibutyag nga nihangyo sila sa disaster council nga magtukod og water treatment facility diha sa prisohan isip long term solution sa problema.

Samtang si Konsehal Nestor Archival, Sr. nibutyag nga ang konseho nag-umol og special body aron matabangan ang pagsulbad sa problema ug maggahin usab og budget niini. /BDB (BANAT NEWS)