Negosyante, seaman, clerk: Nangasikop sa drug busts

CEBU, Philippines — Negusyante og salon; kanhi seaman; barangay clerk nangadakpan sa managlahing buybust operations sa kapolisan nga niresulta sa pagkasakmit sa daghang gituohang shabu sa miaging gabii. Ang Minglanilla Police Station pinangulohan ni Police Major William Homoc mihimo og operasyon diha sa merkado publiko sa Brgy. Inayawan sa Dakbayan sa Sugbo ug gidakop ang nanagiya og salon nga si Ricardo Sabellano Carin alyas “Erick”, 41.

Matud pa ni Homoc nga dugay nadakpan si Carin kay nagusab-usab kini og lokasyon diin sila magtagbo hangtud naabot sila sa Inayawan ug didto kini nila gidakop ug nakuhaan og 25 gramos nga gituohang shabu ug ang buybust money.

Sa operasyon sab sa Cebu City, nadakpan sa buybust operation sa Carbon Police Station 5  ang kanhi seaman diha sa dalan Panganiban, Brgy.Pahina Central, nga si Macon Abrantes Hendoy,30, ug kaubang si Jerwin Kyle Villacin Engbino ,21,. Ang duha nakuhaan og 13 gramos nga gidudahang shabu.

Sa laing operasyon diha sa Barangay Hipodromo, nasikop ang usa ka clerk sa barangay nga si Analiza “Aling” Mendez,40, sa grupo ni Police Major Kenneth Paul Albotra sa San Nicolas Police Station, City Drug Enforcement Unit ug Philippine Drug Enforcement Agency-7.

Matud ni Albotra, duna silay nadakpan nga nitug-ang gikan kang Mendez napalit ang shabu nga ilang nasakmit hinungdan nga ilahang gilusad ang operasyon diha sa Sitio Magpalacer, Hipodromo.

Nasakmit gikan kang Mendez ang 4.05 gramos nga mokabat P27 mil ug ang buy bust money.

Si Kapitan Ruperto “Dondon” Bacolod Jr., sa Barangay Hipodromo, nitug-an nga grabe ang iyang kasagmuyo sa pagkasikop ni Mendez kay wala gayud sila makabantay sa binuhatan niini.

Matud niya nasulod si Mendez sa iyang administrasyon human ang ilang clerk nibalhin ug lain trabaho ug nalooy siya kay duna kini mga anak ug hanas na sa maong trabaho.

Si Bacolod, nitug-an nga base sa ilang nasayran ang igsuon sa dinakpan maoy ilang nadunggan nga nagpaduwa apan nieskapo na sa ilang lugar. Gitug-an sab ni Bacolod nga si Mendez aktibo sa ilang BADAC meeting isip tigsuwat sa minutes.

Ang barangay aduna unta ipahigayon nga random drug test apan wala lang gyud kaabot ug nasikop si Mendez. Matud ni Bacolod way luna sa iyang opisina ang mga nalambigit sa ginadiling drugas.  /IBM (BANATNEWS)