Piyesta sa Inmaculada Concepcion gisaulog kagahapon

CEBU, Philippines —  Bagang duot sa katawhan nga nitambong sa gipahigayon nga pontifical mass ni Archbishop Jose Palma sa Cebu Metropolitan Cathedral subay sa kapistahan sa Immaculate Concepcion. Gidasig ni Palma nga dili mahadlok ug isalig lang gyud ang tanan ngadto sa Mahal nga Birhen kinsa nagpakatawo sa iyang anak aron sa pagluwas sa mga makasasala. Matud sa Arsobispo nga angayan lang pasidunggan ang Mahal nga Birhen tungod kay wala kini buling sa sala ug tungod sa pagpanamkon niini sa iyang anak nga si Hesus nga maoy nagpapas sa sala pinaagi sa pagpakamatay aron sa pagluwas sa katawhan.

Dugang ni Palma angay magmaampoon ang katawhan ug mosalig lang ngadto kang Santa Maria nga maoy Langitnon nga Inahan sa tanan ug andam maminaw sa tanang yangungo sa iyang mga anak.

Ang Arsobispo niawhag usab sa katawhan nga dili ihikaw ang ilang mga pagtabang ngadto sa ilang mga isigkaingon ilabi na ngadto sa mas labing nanginahanglan.

Sumala pa ni Palma nga angay hinumduman sa katawhan nga dili magpakawala sa paglaum ug dili makalimot sa pagduol sa Mahal nga Birhen sa tanang panahon. Si Palma nipasabot nga ang kalihukan sa Immaculate Concepcion gipahigayon kagahapon tungod kay atol sa piyesta niini mao man usab ang ikaduhang Domingo sa Adbiyento.  GMR (BANATNEWS)