Piggery, Poultry gipasirad-an ni Ahong
CEBU, Philippines — Gipasirad-an ni Lapu-Lapu City Mayor Junard “Ahong” Chan ang piggery ug poultry nga nag-operate sa siyudad tungod sa kabaho.
“We are business friendly but if it is hazardous na to residents around, nanga-sakit na ang mga tawo sa palibot, di na ni mahimo,” matud ni Chan.
Ang piggery sa Barangay Pajac gipanag-iya ni Henry Sta. Teresa samtang si Ma. Dolores Rivera Osuyos ang tag-iya sa poultry.
Kining mga establisemento giingong wala molukat ug mobayad og business taxes ug wala marehistro ang business permit sa opisina sa mayor.
Dugang sa mayor nga ang duha ka establisemento gireklamo na sa mga residente kaniadto pang niaging administrasyon apan walay aksyon nga gihimo.
Ang mayor nidugang nga ang maong poultry ug piggery gipahibawo na nga nga ipasira kaniadto pang niaging buwan aron mahatagan og higayon nga makabalhin apan wala kini molihok.
Ang poultry adunay 500 ka manok samtang ang piggery adunay 30 ka baboy.
Nunot sa kamanduan, gihatagan ni Chan og tulo ka adlaw ang tag-iya nga boluntaryo nga moguba sa istraktura ug kung mapakyas hayan dugang lakang ang himoon batok sa tag-iya niini sa lain na sab nga kalapasan. GMR (BANATNEWS)
- Latest
