May kasong qualified theft sikop sa Mandaue

CEBU, Philippines — Nadakpan sa kapolisan sa Presinto 1 sa Mandaue City Police Office ang 42-anyos nga lalaki nga adunay warrant of arrest sa kasong qualified theft nga giatubang niini.

Si Police Staff Sergeant Jayson Estrera sa warrant section sa Presinto 1 sa MCPO maoy kauban sa mga sakop sa Criminal Investigation and Detection Group 7 sa pagdakop sa akusado nga si Johnvier Banlat Palaban nga taga Barangay Lahug, Dakbayan sa Sugbo apan temporaryo nga nagpuyo sa Ibabao Estancia sa Dakbayan sa Mandaue.

Matud ni Police Corporal Wendell Navasquez sa Presinto 1 sa MCPO nga P90,000 ang girekomendar nga piyansa sa korte alang sa temporaryong kagawasan sa maong dinakpan.

Dugang pa niya nga sa dili pa nila dad-on ngadto sa Mandaue City Jail ang dinakpan, dad-on pa nila ngadto sa korte nga maoy nagluwat sa warrant of arrest alang sa pagpahibalo sa pagkasikop na sa maong suspetsado.

Si Corporal Navasquez niingon nga ang ilang imbestigador mohimo pa og dugang pagsukit-sukit sa pagsuta sa kaso nga qualified theft niini nga giatubang sa maong suspek sa dili pa nila himoon ang pagpresentar niini ngadto sa korte. /GMR (BANATNEWS)