Pushers nasunogan nibalhin nasikop

CEBU, Philippines — Kapin sa P7 milyones nga kantidad sa gidudahang shabu ang nasakmit sa gipahigayon nga buy-bust operation sa Drug Enforcement Unit sa Cebu City Police Office-Pardo Police Station.

Ang operasyon gipangulohan ni Police Major John Kareen Escober alas 10:05 sa gabii niadtong Biyernes sa Sitio Isla Verde, Barangay Inayawan.

Ang nadakpan mao sila si Marc Joseph Labrado, 24, target sa operation ug ang ikaduha mao si Richard Liquin Gadiane, 28, pulos nagpuyo sa maong dapit.

Matud ni Escober nga ang mga dinakpan gikan sa Barangay Duljo Fatima ug nibalhin og pinuy-anan kay nasunog.

Dugang ni Escober nga si Labrado ug Gadiane anaa sa drug watchlist isip mga high-value target regional level.

Atol sa buy-bust ang duha nakuhaan og 1,037.5 gramos sa gidudahang shabu nga gibanabana nga mobalor og P7,055,000.

Gisubay pa sa kapolisan ang tinubdan sa ilegal nga drugas nga nakuha gikan kang Gadiane ug Labrado.

PDEA buy-bust

Sa laing bahin P680 mil nga balor sa drugas ang nasakmit sa mga tinugyanan sa Philippine Drug Enforcement Agency 7 sa duha ka dinakpan sa Barangay Santo Niño, Dakbayan sa Sugbo alas 10:30 sa gabii niadtong Biyernes.

Ang mga dinakpan mao sila si Jhon Louis Daan, 26, ug Jack Branzuela, 31-anyos.

Nasakmit gikan sa mga dinakpan ang mga pinutos sa ginadili nga drugas nga motimbang og 100 gramos.

Matud ni Leia Albiar-Alcantara, tigpamaba sa PDEA-7, nga dul-an sa usa ka semana ang case build-up una natigayon ang pagsikop sa mga dinakpan.

Oplan Linis Talisay

Samtang tulo ka HVT ang nasikop diin usa ang nakasibat sa gihimong sub-sob nga pagpatuman sa search warrant sa managlahing barangay sa Siyudad sa Talisay.

Si Police Major Gerard Ace Pelare, hepe sa Talisay City Police Station, nibutyag nga nakakuha sila og upat ka search warrants gikan sa korte batok sa mga kriminal.

Unang operasyon nahimo alas 10:45 niadtong Biyernes sa gabii sa pinuy-anan ni Dioverlyn Briones, 27, sa Sitio Salvador, Barangay Tangke, diin nakuha ang 15.42 gramos nga shabu nga balor og P104,856.

Alas 12:45 sa kaadlawon nadakpan si Maissa Rosco, 29, sa iyang panimaye sa Sitio Neighborhood, Barangay Tabunok, kinsa nabilanggo na kaniadto gumikan sa ilegal nga drugas apan nakabuhi tungod sa plea bargaining agreement.

Nakuhaan siya og 24.6 gramos nga shabu nga adunay balor nga P167,280.

Nadakpan sab si Rolly Sabroso alyas Rolly Morella, 29, sa Sitio Ilang-Ilang, Barangay Lagtang alas 2:40 sa kaadlawon, kinsa nakuhaan siya og shabu nga nitimbang og 15.84 gramos nga balor og P107,712.

Samtang nakasibat si Emeliano Ranghos alyas Teting, 43, uban sa iyang asawa apan nakuha sa mga awtoridad ang shabu gikan sa pinuy-anan niini nga nitimbang og 5.50 gramos nga adunay balor nga P37,400.

Na-rescue sab sa operatiba ang lima ka menor de edad nga naatlan sa maong lugar.

Si Pelare nagkanayon nga ubos sa ilang programa nga Oplan Linis Talisay ang ilang gibuhat subay sab sa subsob nga kampanya batok sa ginadiling drugas. (/GMR)(BANATNEWS)