Bombero gibasol sa sunog sa Naga

CEBU, Philippines — Gibasol ang kabombe-rohan sa Dakbayan sa Naga sa giingong pagdako sa kayo sa nahitabong sunog diha sa Barangay Inuboran niadtong niaging kadlawon.

Usa sa mga residente nga nagdumili magpaila nga nahinabi sa Banat News nibutyag nga brownout sa ilang dapit nianang panahona. Kalit sila nga nakadungog nga adunay nibuto hangtud nga pipila ka oras ang nilabay ug gipukaw na lang sila sa dakong kayo.

Nagsugod ang kayo sa balay sa ilang silingan hinungdan nga nitawag siya sa kabomberohan sa siyudad.

Matud sa maong residente nga pila ka higayon siya nitawag apan dili ma-contact ang fire station.

Ug tungod kay dili man ma-contact ang fire station personal na nga  niadto ang usa sa mga residente sa lugar nga nagsakay og motorsiklo ug namukaw sa mga bombero. “Dili man unta ni makadako kay mahimo ra gyud sila makaabot sa amoa mga singko minutos kay mingaw naman”, matud sa maong residente.

Upat ka balay ang nasunog nga gipanag-iya nila ni Edie Garcia, Virginia Bastismo, Danilo Basalo ug Ramonito Deguma.

Base sa spot report sa City Disaster Risk Reduction and Management Office (CDRRMO) nga naalarma ang sunog mga alas 4:23 sa kadlawon ug na-fire out kini alas 5:47 sa buntag.

Wala hinuoy gikatahong naangol o nakalas sa maong hitabo. Apan ang isyu wala pa mahuman tungod kay daghan ang nagbagotbot diha sa social media sa giingong kalangay sa bombero nga niresponde. (/BDB)(BANATNEWS)