PROBE nangayo og pasaylo; Junk shop ipasirado
CEBU, Philippines — Ang hepe sa Prevention Restoration Order Beautification Enhancement (PROBE) Raquel Arce nangayo og pasaylo sa publiko kabahin sa nag-viral nga video sa insidente nga nahitabo diha sa A. Soriano Street, Barangay Mabolo, Dakbayan sa Sugbo.
Sa post ni Joseph Deriada diha sa facebook niadtong Huwebes nakita ang sakop sa PROBE nga nidakop sa orange vendor ug gisuwayan sa vendor og kawhat ang iyang baligay diin ang uban niini nakatag na diha sa daplin sa karsada.
Ang maong vendor gipugngan sa mga sakop sa PROBE ug giduot-duot diha sa railings sa sidewalk.
Sa pagsuwat niining balita ang maong post nakakuha na kini og 35,000 likes, 26,000 comments, 68,000 shares ug kapin sa 1 milyon ang views ug nakaani og pagsaway ang mga sakop sa PROBE.
Si Arce nagkanayon nga igo lang nihimo sa ilang trabaho ang iyang mga sakop hinuon iyang giangkon nga aduna kini nahimong sayop.
Sa wala pa ang maong insidente giingong gibadlong na kaniadto ang maong orange vendor apan nagmagahi gyud kini.
Si Arce nitugyan na sa maong isyu ngadto sa city legal aron mopahigayon og imbestigasyon ug giawhag usab niya ang vendor nga moreklamo usab diha sa nahisgutang buhatan kong naargabiyado kini.
Sa laing bahin, irekomendar sa Cebu City Legal Office ang pagpasirado sa usa ka junk shop nga nahimutang diha sa Palma Street, corner S. Osmeña duol sa side entrance sa Cebu Technological University (CTU). Si Atty. Jared Limquiaco niisyu og show cause order batok sa junk shop tungod kay pakyas kini sa pag-renew sa mayor’s permit gikan sa 2016-2019 ug nakalapas usab kini sa environmental ordinance. (/BDB)(BANATNEWS)
- Latest
