70 ka motor banca nikuyog sa fluvial sa Birhen sa Regla

CEBU, Philippines – Nikabat ngadto sa 70 ka motor banca ang niapil sa ika-19 nga fluvial procession kagahapon alang sa kapistahan sa Birhen sa Regla.

Ang maong fluvial procession diha nanukad sa Cebu Pacific Resort sa Suba Basbas sa Dakbayan sa Lapu-Lapu. Sa wala pa gipahigayon ang fluvial precession gipahigayon una ang farewell mass diha sa Marigondon Parish Church sa Barangay Marigondon nga gidumala ni Reverend Father Roberto Villanueva. 

Human sa maong misa gikarga sa karo ang imahen sa Birhen sa Regla sa karo ug gihimo ang motorkada paingon sa nahimutang sa gallon nga luwanan sa maong imahen.

Alang sa seguridad sa kalihukan ang Lapu-Lapu City Police Office (LLCPO), Armed Forces of the Philippines (AFP) ug Philippine Air Force (PAF) nipakatap og 300 ka personnel lakip sa force multipliers mga alas 3:00 sa kadlawon kagahpon.

Si Eduardo Mendez, tourism officer sa dakbayan nagkanayon nga higpit nga pagpangandam alang sa kalihukan ang ilang gihimo.  Ang gallon nga gisakyanan sa imahen nitadlas kini diha sa Mactan Channel sa mga barangay sa Marigondon, Agus, Maribago, Punta Engaño, Mactan, Buaya, Ibo, Pusok, Pajo ug Poblacion ug nidunggo sa Mulle Osmeña Whart sa Poblacion. (/BDB)(BANAT NEWS)