Duha ka sunog niulbo usa ang angol

CEBU, Philippines — Usa ka tawo ang naangol ug nikabat ngadto sa P50 mil ang danyos sa nahitabong sunog sa Dakbayan sa Sugbo ug Danao kagahapon.

Unang insidente nahitabo diha sa Good Shepherd, Barangay Banawa, Dakbayan sa Sugbo, alas 5:40 sa buntag diin usa ka commercial building nga gipanag-iya ni Raymundo Dela Cerna ang na-partially burned. Si Dela Cerna nakaangkon kini og 1st degree burned sa iyang tuong kamot.

Ang kayo sa maong sunog nakontrolar kini alas 6:11 sa buntag diin gibana-bana nga niabat ngadto sa 25 mil ang danyos niini.

Ang kabomberohan nagpahigayon pa kini og imbestigasyon sa hinungdan sa nahisgutang sunog.

Mga alas 11:33 sa buntag laing sunog ang niulbo diha sa Sitio Santo Niño, Barangay Looc, Dakbayan sa Danao diin ang kayo giingong nagsugod diha sa panimalay ni Joshua ug Emily Pacto.

Matud pa ni Fire Officer 1 Naija Pajal, fire investigator sa Danao City Fire Station nga na-fire out ang maong sunog alas 11:38 sa buntag ug giisa lang kini sa 1st alarm.

Gibana-banang nikabat ngadto sa P22 mil ang danyos sa maong sunog diin usa ka balay ang hingpit nga naugdaw ug duha ang partially burned ug tulo ka pamilya ang apektado.

Ang kabomberohan sa maong siyudad nagpahigayo  usab og imbestigasyon sa hinungdan sa nahisgutang sunog. (/BDB)(BANATNEWS)