Talisay napiling pilot city sa lapad nga earthquake drill

CEBU, Philippines — Ang Sugbo natung-an kini sa duha ka probinsiya nga naigo sa linog ug gikatahong ang Dakbayan sa Talisay nakita nga usa sa mga lugar nga adunay pipila ka fault line.

Si Alvin Santillana, pangulo sa Talisay City Disaster Risk Reduction and Management Office (CDRRMO) nagkanayon nga subsob ang ilang pagpangandam sa  katalagman nga posibleng moigo.  Gani, karong Nobiyembre 14 niining tuiga magpahigayon na usab ang siyudad sa halapad nga earthquake drill nga salmotan sa kadaghanan ilabi na sa mga tunghaan.

Si Arjay Hernandez, information officer sa Office of the Civil Defense (OCD) nibutyag nga ang mga tunghaan ang ilang gitutokan.

Kini human sa nahitabong linog sa Mindanao diin ang mga eskwelahan ang kasagarang nakabaton og kadaot ug adunay natumpag.

Nagkanayon si Hernandez nga maayo usab nga kong ang usa ka pamilya kong adunay igong kwarta palig-onon ang gipuy-an niini nga balay o ang tag-iya sa balay mopalig-on sa ilang edipisyo aron dili maguba o matumpag kong adunay linog nga moigo.

Ang Dakbayan sa Talisay maoy napili nga pilot city sa tibuok rehiyon-7 alang sa ipahigayon nga drill.

Ang buhatan ni Hernandez maoy mag-evaluate sa ipahigayon nga kalihukan pagsuta sa katakos sa siyudad sa pag-atubang sa katalagman. (/BDB)(BANATNEWS)