Account gi-hack, hubo nga videos gikatag

CEBU, Philippines —  Nagpatabang ang usa ka 22 anyos nga babaye sa Anti Cybercrime Group (ACG-7) human nga gi-hack ang iyang Social Media account human nga nakig video call sa gituohan niining usa ka langyaw.

Si Ana dili niya tinuod na pangalan nga taga Dakbayan sa Sugbo mireklamo sa gibuhat sa nakaila niyang langyaw nga nagpailang si Saleem Khan Afridi.

Nagkaila ang duha sa social media kataposang semana sa Septiyembre hangtud nga mihangyo kaniya ang langyaw nga makig video call.

Miangkon kini nga gihaylo siya sa langyaw og kwarta aron siya maghubo sa video camera nga iya sab gibuhat.

Apan niadtong Oktobre 26 dihang giablihan ni Ana iyang account nakurat siya nga adunay nagsige og send og videos niya nga naghubo ngadto sa iyang mga kabanay ug mga higala.

Lakip sa nakakita ang inahan niini kinsa nasagmuyo ug nahiubos tungod sa di katuohang buhaton kadto sa anak nga matud niini edukada ug disiplinado. Sa pagkakaron gisubay sa ACG kun kinsa ang maong langyaw nga mao y suspek sa pagpakatap ug pagpakauwaw sa maong dalaga. IBM (BANATNEWS)