Konseho sa mandaue ‘paperless’ na

CEBU, Philippines — Gipatuman na sa konseho sa Dakbayan sa Mandaue ang moderno nga pamaagi sa pagpatala sa ilang mga ordinansa nunot usab sa ilang pagpakiglambigit sa usa ka kompaniya nga nagtanyag sa serbisyo pinaagi sa paggamit sa binag-ong teknolohiya sa Globe Telecom.

Nunot sa paggamit sa binag-ong pamaagi sa konseho sa Dabayan sa Mandaue maoy pagahimoon karon sa mga sakop sa konseho sa pirma alang sa Globe Business’ Document Management System.

Kini magtugot sa kagamhanan sa paghipos ug pagpreserbar sa mga mahinungdanon nga mga dokumento sukad pa sa sayo sa mga tuig 195Os.

Ang pagsagop na sa mga binag-ong pamaagi sa konseho sa dakbayan sa paghipos sa mga dokumento daku kini og ikatabang sa konseho sa pagpalabang og mga ordinansahon nga ang paggamit og papel wala na kinahanglana ug digital na ang pagahimoon nga transaksiyon.

“One of the priorities of this administration is to make the delivery of public service more efficient and impactful, thus, we found the need to go paperless,” matud ni Bise Mayor Glenn Bercede.

Nunot niini ilang gihangop ang tabang sa Globe Telecom nga mapatuman ang Document Management System sanglit nakahatag man kini sa mga sakop sa konseho nga mahimo usab nga epek tibo sa pagtuman sa ilang mga gimbuhaton. (Romeo T. Limpangog/GMR)

Libreng sine sa mga PWDs

Gisugyot ni Konsehal Alvin Dizon ang pagpalapad sa benepisyo sa Ordinance 2466 nga naila usab nga “The Senior Citizens Free Movie Access to All Theaters Ordinance of the City of Cebu and Providing Penalties for violations Thereof”.

Buot si Dizon nga iapil na ang mga Persons with Disabilities (PWDs).

Ang City Ordinance 2466 nagtugot sa mga rehistradong senior citizens sa siyudad sa libreng tan-aw og salida sa sinehan matag Lunes hangtud Biyernes gawas lang sa mga holidays ug adlaw nga Sabado ug Domingo.

Sa sugyot ni Dizon nagtumong kini sa pagpalapad sa pribilihiyo sa mga PWDs pinaagi sa pag-usab sa City Ordinance 2466 ngadto sa “The Senior Citizens and Persons with Disabilities Free Movie Access To All Theaters Ordinance of Cebu City.”

Matud ni Dizon nga ang mga senior citizens ug PWDs mahinungdanon sa katilingban nga dili lang kinahanglan og suporta ug proteksyon apan usab ang pribilihiyo ug benepisyo nga makatabang sa bisan unsang aspeto aron mapauswag pa ang ilang adlaw-adlaw nga kinabuhi.

Kini ang prayoridad sa gobiyerno nga maghatag og dugang nga mga benepisyo ug mga pribilihiyo nga gihatag na sa nasudnong kagamhanan nga makatabang sa ilang kahimsog ug maayong kahimtang ug ang pagpakiglambigit sa mga pribadong sektor nga makatabang sa mga kinahanglan sa mga senior citizens ug PWDs.

Ang Siyudad sa Sugbo nagpatuman usab sa mga balaud aron mapalambo ug mapanalipdan ang mga katungod sa mga senior citizens ug mga PWD pinaagi sa mga polisiya ug programa nga nag-ila sa ilang kontribusyon sa katilingban.

Ang gisugyot nga ordinansahon tukion sa sunod sesyon sa konseho sa siyudad. (/GMR)(BANATNEWS)