Naninda sa Calamba Cemetery nagmingaw
CEBU, Philippines — Pipila ka manindahay og buwak ug kandila sa Calamba Cemetery sa Dakbayan sa Sugbo ang nihulagway nga hinay ang ilang halin sa kalag-kalag karong tuiga itandi sa mga nanglabay nga katuigan.
Si Chona Baguio niasoy nga hinay ang ilang halin tungod kay wala naman sila nagpwesto sa gawas ug naa na sila sa sulod. “Mohalin mi diha og tag P12,000, P10,000 karon wala kaabot og libo among halin, wa gani kaabot og P500 daku’g deprensiya, petsa 31 mohalin nami diha og libo kapin, dos mil kapin karon bisag moabot pa og uno maglisud pa mi, among puhunan di mi kabawi,” asoy ni Baguio.
Sumala pa ni Baguio nga kun mahalin man ang ilang baligya apan igo ra makabawi sa puhunan ug ang ganansiya gamay ra.
Ang Prevention, Restoration, Order, Beautification, Enhancement (PROBE) Team maoy nagpabalhin kanila sa sulod nga bahin.
Si Police Major Kenneth Albotra, hepe sa Police Station 6, niingon nga gipahugtan gyud nila ang pagpatuman og seguridad sa maong sam-ang.
Pipila sa mga nakompiskar nila nga ginadili mao ang butane, replica sa armas ug uban pa. (GMR)(BANATNEWS)
- Latest
