118 ka pamilya nawad-a’g panimalay
CEBU, Philippines — Dul-an sa 50 ka mga panimalay sa 118 ka mga pamilya ang nawad-an og pinuy-anan human niulbo ang dakong sunog diha sa Sitio Ipil-Ipil Alaska, Barangay Mambaling ning Dakbayan sa Sugbo kagahapon sa kaadlawon.
Nadawat sa kabomberohan ang alarma ala 1:45 sa kaadlawon ug napawong kini alas 6:38 na sa buntag.
Gikatahong nagsugod kini sa panimalay ni Junmark Gonzaga apan ipaubos pa kini sa imbestigasyon ang hinungdan niini. Matud pa ni Senior Fire Officer 3 Hermes Molina, Fire Investigator ipatawag pa nila ang tag-iya sa panimalay aron masubay ang hinungdan niini.
Lima ka balay sab ang nakan-an sa kalayo ug gibanabanang nagbilin kini og P139 mil nga danyos.
Usa ka Jefferson Betasolo ang naangol sa walang tiil ug upat ang na-rescue sa mga Special Rescue Unit sa BFP nga na-trap sa ilang panimalay nga gilangkuban sa usa ka ginang ug tulo ka mga bata.
Ang mga nasunogan kasamtangan usa nagpasilong sa Viking Gym.
Ang maong sunog ikatulo na kini karon tuiga sa Alaska Mambaling, diin una didto sa Puntod, ikaduha sa Wangyu. Ang mga residente sa lugar nagtuo nga overloading sa linya sa kuryente maoy hinungdan sa sunog.
Usa ka Christine Vergara, nitug-an wala gayud silay nabitbit ug tapot lawas lang tungod kay gisiguro niya ang iyang duha ka mga anak ug luwas ra hinoon sila. Ang mga nasunogan nanawagan karon ug hinabang sama sa mga sapot, habul, banig ug uban pa.(IBM)(BANATNEWS)
- Latest
