Mga ‘ungo’ nibutho sa Talisay City Hall

CEBU, Philippines — Nalisang ang pipila ka mga tawo nga adunay transaksyon sa Talisay City Hall kagahapon human  nibutho ang klase-klaseng mga empleyado nga  nagtakubang mga ungo.

Apan ang nahitabo kagahapon mao lang ang tipik sa kalingawan nga trick or treat Halloween Special sa Talisay City Hall. Ang maong kalihukan gihimo sa Sangguniang Panlungsod Personnel Association (SPPA) aron sa paghatag og kalingawan sa mga kabataan.

Halos tanang opisina ang gidayandayanan og makahadlok nga mga butang lakip na ang session hall ug aduna gyuy sound effects nga makapanimbawot og balahibo.

Ang maong kalingawan nahimo sugod sa alas- 9 sa buntag hangtud sa alas- 12 sa udto. Hinuon wa ra mabalda ang trabaho sa pipila ka opisina.

Si Jerome Candia, sakop sa SPPA nagkanayon nga ikaduhang tuig na nila kining gihimo.

Sa una nilang pahigayon sa maong kalingawan nakakuha kini og maayong resulta hinungdan nga ila kining gipalambo.

Daghang kabataan ang nisalmot ug nalingaw sa pagpangolekta og karmelitos sa nagkalain-laing opisina.

Ila sab nga gipasabot sa mga kabataan nga dili lang kalingawan ang adlaw sa mga kalag ug Santos kun di ang importante mao ang paghandum sa mga minahal sa kinabuhi pinaagi sa pagampo sa ilang mga kalag nga mahiluna. IBM (BANATNEWS)