Duha patay sa drugbust

Cebu, Philippines — Duha ang patay ug usa ka polis ang naangol sa buybust operation nga gihimo diha sa Sitio Baha-Baha Brgy. Tayud, Consolacion kagahapong adlawa samtang P10.5 milyones nga gidudahang shabu ang nasakmit sa laing duha ka buybust operations nga gihimo sa Dakbayan sa Sugbo niadtong Biyernes sa gabii.

Giila ang mga namatay nga sila Ritche Yballe alyas Kano giila nga leader sa grupo ug si Reynaldo Mabuti alyas Yetyet nga pulos nakonbikto sa kasong pagpanulis ug pamaligya sa illegal nga drugas.

Matud ni Police Major Verniño Noseralle hepe sa Consolacion Police Station nga taud-taod na nilang gi-monitor ang duha human nga ang upat nil aka mga kauban nangadakpan na.

Wala na mahibulong ang kapolisan sa pagsukol sa duha tungod kay daan na silang nailhan nga siga, maldito ug nanganting andam mopatay.

Giingong mga construction workers ug mga bodegero. Atol sa pagronda gibanabanang dunay 15 ka tawong nanunuyop sa dapit apan nakaikyas atol sa komosyon.

Nasikop hinuon ang uban kanila nga silang Geronimo Auman, 18, ug Ricky Montejo,31, taga Sitio West Binabag, Brgy. Tayud Consolacion.

Lima ka medium size nga paketeng shabu nga mobalor dul-an P200 mil, drug paraphernalia, gamit sa pag repack sa shabu ug cellphone ang nakuha gikan sa duha. Samtang gidala usab sa tambalanan ang usa ka polis nga si Police Corporal Alden Colegado human nga napusilan ni Kano sa dughan apan swerteng nagsul-ob kini og bulletproof vest.

Sa pikas bahin, P228.9 milyones  na nga balor sa shabu ang nasakmit sa Cebu City Police Office sulod lang sa 110 ka adlaw sa mga gipahigayon nga buybust operations sa nagkalain-laing dapit sa dakbayan.

Matud pa ni CCPO Director Police Colonel Gemma Vinluan nibalik pagdaghan ang supply sa shabu sa dakbayan sa Sugbo. Sukad sa pagkasakop sa 88 kilos nga shabu sa Probinsya sa Samar nga gidudahang paingon unta dalhon sa Sugbo. Gituohang dunay nakalusot sa maong shipment dinhi. Niadtong Biyernes sa gabii, ang Abellana Police Station uban ang Regional Special Operations Group (RSOG7), Police Drugs Enforcement Group (PDEG- Visayas) ug Mabolo Police Station sa Upper Carreta, Barangay Carreta sa dakbayan ug nakuha ang usa ka kilo ug laing tulo ka medium size nga gidudahang shabu gikan sa dinakpang si Mirasol Maranga Bonane, 41, nga maoy subject sa operasyon. Gibana-bana nga mobalor dul-an P9 milyones ang drugas nga gisulod og container sa pintura. Matud pa sa hepe sa Abellana Police Station Police Major Edward Sanchez si Bonane maoy kuhaanan sa stocks sa illegal nga drugas sa maong dapit.

Sa operasyon sab sa Sitio Pungtod, Brgy. Mambaling nasakmit ang kapin P1.5 milyon nga balor sa gidudahang shabu  gikan sa high value  target nga si Eric Booc, taga Ermita.

Si Police Captain Francis Talosig, hepe sa Mambaling Police Station miingon nga si Booc dugay ng gipanid-an. Ang tanang dinakpan pasakaan og kasong kalapasan sa Republic Act 9165 o Comprehensive Dangerous Drugs Act of 2002. IBM ( BANAT NEWS)