Kalihukan sa sinulog moagi tanan sa SFI
Cebu, Philippines — Wala imbitara si Cebu City Vice Mayor Michael Rama sa tigum sa Cebu City Sinulog Governing Board niadtong Huwebes.
Atol sa tigum gipresentar sa CCSGB ang ilang mga kalihukan alang sa selebrasyon sa Sinulog sunod tuig.
Hinoon matud ni Rama nga ang mga kalihukan sa Sinulog nga gipresentar sa CCSGB aprobahan pa sa Sinulog Foundation, Inc. diin siya ang chairman.
“From the point of view of the Sinulog Foundation, it’s only a proposal,” matud ni Rama.
Ang bag-ong kalihukan sa Sinulog naglakip sa Sinulog sa Palaboy; Drum the Beat, Beat the Drum; Sinulog Market Street Fair; Kalingawan gikan sa National TV stations sa Abellana, Plaza Independencia, Fuente Osmeña; Pangunang Punto sa Pintados; ug mga pangpamilyang kalihukan sama sa Family Strong Man ug Duathlon.
Samtang ang updated nga kalihukan sa Sinulog naglakip sa duha ka kompetisyon alang sa Sinulog Idol; duha ka tema/kategorya alang sa parada sa mga floats; pagpuli sa short film contest og vlog; kooperasyon kauban ang Grammy Award Winner John Ingoldsby alang sa Sinulog theme song; ug apil ang Binibining Cebu nga usa sa mga highlights sa Sinulog.
Apan si Rama supak sa pag-ilis sa short film contest og vlog.
“From the Sinulog Foundation kanang film namo, as is na, way moilis ana,” sigun ni Rama.
Giklaro usab ni Rama nga ang SFI maoy responsable sa tanang kalihukan alang sa Sinulog.
Matud niya nga dili mahimong magbuhat og kalihukan kung dili moagi sa SFI.
Sa iyang bahin, si Mayor Edgardo Labella nagkanayon nga wala gidapit si Rama tungod kay dili siya sakop sa CCSGB. Gipasabot ni Labella nga ang mga kalihukan nga gipresentar sa CCSGB gipahiangay na sa SFI.
Dugang niya nga ang CCSGB niuyon kung unsa ang giuyonan sa SFI. GMR ( BANAT NEWS)
- Latest
