Kaso sa dengue sa Cebu City nisaka
CEBU, Philippines —Nikabat ngadto sa 2,215 ang kaso sa dengue diin 15 niini ang namatay nga natala sa Dakbayan sa Sugbo sukad niadtong Enero 1 hangtud sa Oktubre 19, 2019.
Base sa report sa Cebu City Health Department nisaka ngadto sa 5.63 porsyento itandi sa nilabay’ng tuig sa susamang mga bulan nga 2,097 ka kaso sa dengue ug 12 niini ang namatay.
Nikabat ngadto sa 43.89 porsyento ang mga naapektohan sa dengue kinsa nagpangidaron gikan sa usa ka tuig hangtud sa 10-anyos.
Ang mga nabiktima sa dengue nagsugod sa 15 pa lang ka adlaw nga bata hangtud sa 85-anyos.
Adunay 1,157 ang gidaghanon sa mga pasyente nga lalaki kinsa nataptan og dengue ug 1,057 ang gidaghanon sa mga babaye.
Base sa record sa DOH, ang Barangay Guadalupe ang adunay taas nga kaso sa dengue nga niabot ngadto sa 167.
Gisundan sa Barangays Lahug nga adunay kaso nga 128; Inayawan, 96; Apas, 80; Tisa, 79; Labangon, 73; Pardo, 70; Basak San Nicolas, 69; Mabolo, 67. BDB (BANAT NEWS)
- Latest
