Mga tulisan gipasakaan na og kaso

CEBU, Philippines — Pormal na nga gisang-at sa Mandaue City Police Office ang kasong robbery in band batok sa 13 ka suspek sa pagpanulis sa usa ka mall sa Dakbayan sa Mandaue.

Kini ang gibutyag ni MCPO Director Jonathan Abella human gisang-at ang kaso batok nila ni Roel Sumingit, Jun Candelaria, Juvilyn Quirante, Arnel Cimafranca, ug James Anthony Fernandez.

Lakip nga gikiha ang mga nangamatay gumikan sa pagsukol sa kapolisan nga sila si Glenn Tayrus, Kevin Andales, Wilfredo Enguito ug Philip Fabruda.

Dugang pa ni Abella nga gawas sa siyam nga nailhan, gipasakaan sab og kaso ang laing upat pa nga gawasnon nga kaubanan.

Samtang giawhag ni Bokal Jovito Thadeo “Jonkie” Ouano ang mga nanag-iya og mga establisemento sa pag-hire og mga security guard nga mobantay batok sa mga dautang elemento.

Plano karon ni Ouano, chairman sa committee on peace and order sa Provincial Board, nga moduso og ordinansahon sa pagpabutang og mga security guards sa matag establisemento aron may silo tang dili motuman niini.

Makitagbo si Ouano kang Police Colonel Roderick Mariano, director sa Cebu Police Provincial Office sa dili pa niya mahingpit ang pagduso sa ordinansahon.

Ang konseho sa Dakbayan sa Mandaue pinaagi sa resolusyon ni  Konsehal Jimmy Lumapas ang nagpadayag sa ilang pahalipay sa kapolisan sa dinaliang pagkasikop sa lima ka suspek sa pagpanulis sa JCentre Mall ug pagkapatay sa upat niini.

Ang kapolisan gipangulohan nilang Abella sa MCPO ug Police Major Emily Santos sa Dakbayan sa Bogo.

Sa Dakbayan sa Talisay, gipalig-on ang komunikasyon aron kapugngan ang mga tulis o bisan unsang kriminalidad.

Kini maoy gipasabot ni Mayor Gerald Anthony “Samsam” Gullas Jr. ngadto sa kadagkuan sa mga establisemento nga anaa sa siyudad.

Matud ni Gullas nga gawas sa kapolisan, mahimo na sab nga mosangpit sa mga sakop sa City of Talisay-Traffic Operation Development Authority nga naa sa kadalanan aron makapangayo og panabang sa kapolisan.

Si Gullas makig-estorya sab sa mga opisyal sa barangay aron ma-monitor ang mga tawo nga mopuyo sa ilang lugar.

Gihangyo sab niya ang hepe sa kapolisan sa dakbayan nga si Police Major Gerard Ace Pelare nga hingusgan pa ang ilang intelligence monitoring. GMR (BANAT NEWS)