Bombero mopaubos sa imbestigasyon sa CHR

CEBU, Philippines —Ang bombero nga tag-iya sa sakyanan diin napalgi ang patay’ng lawas sa 10-anyos nga batang lalaki sa Lungsod sa Balamban ang ipaubos na sa imbestigasyon sa Commission on Human Rights (CHR)-7.

Gipahibawo na sa chief investigator sa CHR-7 Leo Villarino ang nahisgutang  bombero nga makig-alayon sa imbestigasyon nga ilang ipahigayon.

Gihangop sa CHR-7 ang giingong pagsanong sa hingtungdan kinsa gikatakdang motambong sa maong imbestigasyon sa sunod semana.

Sayo pa, giimbitar sa CHR-7 ang maong bombero aron mohatag og katin-awan sa nahisgutang insindente.

“We’re happy nga mo-cooperate siya, ato ra giingon mas maayo nga mo-cooperate or give their side para mas dali if they have nothing to hide mas dali nga malimpiyo ang ilahang pangalan”, matud ni Villarino. Ang CHR-7 nihangop usab sa kalamboan tungod kay ang inahan sa bata giingong niuyon na kini nga ipa-autopsy ang iyang anak.

Gibutyag ni Villarino nga sa mosunod nga mga adlaw mo-schedule sila og autopsy sa bata.

“Pag-determine nato unsa may cause of death sa bata, that is precisely the purpose sa autopsy”, ni Villarino pa.

Matud usab ni Villarino nga ang imbestigador nga maoy na-assign sa maong kaso nakakuha na og formal statement sa inahan sa bata ug adunay laing usa nga gikuhaan usab og pamahayag.

Gawas usab niini, giiingong adunay laing tawo ang nakuha sa CHR-7 nga mohatag usab og pamahayag mahitungod sa nahitabo. BDB (BANATNEWS)