Kapitolyo, TVI magpirma og MOA

CEBU, Philippines — Makadawat og bahin sa kita sa usa ka coal-fired power plant sa Dakbayan sa Toledo ang Kapitolyo ingon man ang barangay diin nahimutang ang maong planta.

Ang Kapitolyo pinaagi ni Gob. Gwendolyn Garcia ug Therma Visayas, Inc. (TVI) ang gikatakda nga magpirmahay og memorandum of agreement alang sa saktong pagbahinay sa pinansiyal nga benepisyo gikan sa kompaniya.

Kagahapon gipasar sa Provincial Board ang resolusyon nga gipangamhanan ni Bokal John Ismael Borgonia, chairman sa PB Committee on Environment Conservation and Natural Resources, nga nagtugot kang Garcia sa pagpirma sa kasabutan. Ang TVI ang nagpadagan sa 340-megawatt Toledo Baseload Power Plant sa Barangay Bato, Toledo City.

Gimando sa Republic Act No. 7638, o ang Department of Energy Act of 1992, nga ang DOE mohimo og mga pamaagi nga mahatagan og benepisyo ang probinsiya, siyudad, lungsod, barangay ug komunidad diin dunay energy resource ug energy-generating facility.

Kini ang hinungdan nga gipagawa ang Energy Regulations (ER) No. 1-94 sa DOE niadtong Agosto 1, 1994 aron mapatuman ang Section 5 (i) sa R.A. No. 7638.

Ang R.A. No. 9136, o ang Electric Power Industry Reform Act of 2001 ug Rule 29(A) sa Implementing Rules and Regulations namando sab sa tanang energy generation companies ug energy resource developers sa paghatag og financial benefits nga “one centavo per kilowatt hour” sa total electricity sales ngadto sa mga hingtungdan.

Subay sab sa RA No. 8371 o ang Indigenous Peoples’ Rights Act of 1997, ang DOE nipagawas og Department Circular No. DC2018- 03-0005 niadtong Marso 20, 2018 nga nag-ila sa katungod sa Indigenous Cultural Communities (ICC) ug Indigenous Peoples (IP) sa yuta nga ilang gitikad ug gipuy-an nga mahatagan sab og benepisyo.

Agosto 7, 2018, ang DOE niluwat og Department Circular No. DC2018- 08-0021 aron mapalig-on pa gyud ang paghatag sa maogn benepisyo.

Subay sa Section 6 of DC2018-08-0021, ang financial benefit bahinon sa 25 porsyento sa “one-centavo per kilowatt-hour” alang sa Development and Livelihood Fund (DLF); ug laing 25 porsyento sa P0.0025/kWh alang sa reforestation, watershed, health and or environment enhancement fund (RWMHEEF).

Ang DLF ug RWMHEEF bahinon sa komunidad (5%); barangay (20%); lungsod o siyudad (35%); probinsiya (30%); ICCs ug IPs (5%); ug region (5%).

Matud ni Borgonia nga aron hingpit kini nga mapatuman, kinahanglan mapirmahan ang usa MOA aron maklaro ang mga termino. (BANAT NEWS)