Provincial Board supak polis isip piskal sa kaso
CEBU, Philippines — Supak ang Provincial Board nga ibalik nga ang mga polis ang mobarug isip piskal sa mga kasong kriminal sa ubos nga korte.
Ang PB nipasar og resolusyon sa pagsupak sa lakang ni Provincial Prosecutor Ludivico Vistal Cutaran kinsa niluwat og Memorandum No. 2019-92 niadtong Septiyembre 23, 2019 labot sa maong lakang.
Tumong niini nga gamiton pagbalik ang kapolisan nga mogunit sa kaso diha sa mga municipal courts subay sa Section 5, Rule 110 of the Rules of Court tungod sa kakuwang mga piskal. Ang resolusyon nga gipangamhanan ni Bokal John Ismael Borgonia naghangyo kang Cutaran nga ibalik ang mga piskal diha sa Municipal Trial Courts, Municipal Circuit Trial Courts, ug Municipal Trial Courts in Cities sa tibuok Lalawigan sa Sugbo ug dili ipatuman ang maong memorandum.
Matud ni Borgonia nga ang Section 5, Rule 110 of the Rules of Court nausab na sa A.M. No. 02-2-07-SC nga giluwatan sa Korte Suprema niadtong May 1, 2002.
“In A.M. No. 02-2-07-SC, which amended Section 5, Rule 110 of the Rules of Court, there is no longer any provision allowing peace officers to prosecute cases,” matud ni Borgonia.
Ang PB naghangyo sab kang Cutaran sa pagtambong sa sesyon karong hapon aron ipasabot ang mao niya nga lakang. (BANATNEWS)
- Latest
