Mga layko sa Sugbo

Cebu, Philippines - Kasamtangan nga chairman sa Commission on the Laity, Fe Mantuhac-Barino nasublian nga pangulo gihapon sa mosunod nga tulo ka tuig 2020-2022 human sa gipahigayon nga eleksyon tali sa mga representante sa Lay Organization Movement Association and Service ug mga District Coordinators sa Archdiocese of Cebu kagahapon sa hapon.

Usa ka tigum ang gipahigayon sa mga sakop sa LOMAS ug district coordinators sa wala pa gitapos pinaagi sa usa ka election.

Naglangkob sa Commission on the Laity Board of Directors 2020-2022 mao si Barino ang chairman, Vice-Chairman-Vic Abarquez, Secretary-Annaliza Chiong, Treasurer-Minda Mondejar, Auditor-Alan Larot, PRO-Jimmy Dagoya, Lomas Coordinator-Reynald Andales ug Parish Coordinator-Dave Deriada.

 Nagtuo si Barino nga gigiyahan siya sa Kahitas-an sa malampusong pagdumala ug pagpasiugda sa tulo ka mga dagkong relihiyosong kalihokan nga giapilan sa ilang pundok.

Mao kini ang 2017 Grand Marian Procession diin dasok ang mga tawo, 2018 Salamat Padre ug ang bag-ohay lang nga Pagsangyaw 2019. Matud niya daghan kaayo ang naagni nga mosalmot sa maong mga kalihokan ug nagtuo siya nga tungod niini misalig kaniya ang iyang mga kaubanan sa grupo.

Gitug-an ni Barino, nga usa sa dakong hagit sa ilang pundok ang pag-abag sa umaabot nga mga kalihokan sa Simbahan ilabi na karong tuig 2021 nga mao ang pagsaulog sa ika-500 nga kasumaran sa pag-abot sa Kristiyanismo dinhi sa Pilipinas.

Si Msgr. Roger Fuentes,  ang Spiritual Director sa Commission on the Laity nihagit sa mga nasublian ug sa mga bag-ong sakop sa pagpadayon sa Pagsangyaw 2021 tungod kay dako kini nga programa para sa tibuok archdiocese kung diin padulong na mosulod sa katesismo nga maoy unod sa maong dakong kalihukan. (Rowena D. Capistrano/IBM)