Manindahay og imahen sa Santos ibalhin

CEBU, Philippines — Gibati na sab og kabalaka ang mga manindahay og mga imahen sa Santos kilid sa Basilica Minore del Sto. Niño sa dalan D. Jakosalem nunot sa planong pagpapahawa kanila.

Si Ernie Alvaran, presidente sa Basilica United Vendors Photographers Association, niingon nga nakadawat sila og notice gikan sa Prevention Restoration Order Beautification Enhancement (PROBE) Team aron limpyohon ang ilang mga tindahan nga matud pa ilegal.

Sigun ni Alvaran nga gusto sila mangayo og katin-awan kay ang ilang sitwasyon diha wala maapil sa mga dalan nga hawanan.

Natingala nalang sila nga nakadawat sila sa maong notisya hinungdan nga nangayo sila og katin-awan sa kagamhanan sa Siyudad sa Sugbo dungan sa pagbutyag nga kinahanglang ila kining husayon sulod sa tulo ka adlaw.Apan kun pananglitan papahawaon gyud sila numero uno nila nga pangayoon ang relocation site ug lugar nga pwedeng panindahan sa mga vendors aron mabuhi.

“Mohangyo lang ko sa PROBE mag-negotiate lang ta sa  Mayor’s Office naa tay negotiation kami willing mi unsay inyong kagustuhan basta duna lang sad tay kaayuhan nga ihatag ninyo sa tawo nga nanginabuhi aning lugar, di man sad nato pwede nga adto ning undangon ang tindahan kay daghan man kaayo mapasmo ani,” matud ni Alvaran.

Wala sab makapugong sa pagpadayag sa iyang kasagmuyo kang Mayor Edgardo Labella si Basan Amora, tigpamaba sa Barug Vendors Coalition.

Matud niya nga sa pagdaug ni Labella sa niaging piniliay sila nga mga lider sa vendors naghudyaka tungod kay diha man sila nisuporta sa mayor hinungdan nga sakit alang nila nga ingon ani ang gibuhat sa siyudad ngadto nila.

Ang pangulo sa PROBE nga si Raquel Arce sa iyang bahin niasoy nga ang clearing operation nga himoon sa maong lugar subay gihapon sa DILG Memorandum Circular 2019-121.

Asoy ni Arce nga ang mga istraktura sa mga manindahay sa naasoyng dapit niokupar na sa sidewalk hinungdan ang mga tawo adto na sa karsada moagi.

Matud ni Arce nga ang istraktura sa may dalan D. Jakosalem nakita atol sa final validation nga gihimo sa DILG hinungdan nga gitawag ang ilang atensiyon kun nganong wala matandog ang maong dapit.

“For the second phase karon usa na sa atong natan-aw nga kinahanglan gyud nato i-clear out,” matud ni Arce.

Giklaro ni Arce nga walay makulban og kaldero tungod kay dunay relocation site nga giandam alang niadtong mga manindahay nga maapektuhan sa clearing operation.

Gihimug-atan sab ni Arce nga mahimo nila lugyawan ang tulo ka adlaw nga notisya ug makig-alayon lang ang mga manindahay sa PROBE. GMR (BANAT NEWS)