Armas sa polis nibuto, pasahero naigo

CEBU, Philippines — Naangol ang usa ka pasahero sa traysikol dihang naigo sa pagboto sa armas sa usa ka sakop sa kapolisan nga giingong gisulayan unta sa pag-ilog sa us aka lalaki atol sa pagtubag niini sa alarma sa nahitabong kagubot sa dalan S. Osmeña, sa Barangay Gun-ob, Dakbayan sa Lapu-Lapu niadtong Lunes sa hapon.

Si  Police  Master  Sergeant  Rudy  Anagap  sa  kapolisan sa Presinto 3 sa Lapu-Lapu  City Police Office (LLCPO) miila sa biktima nga mao si Alex Binolirao, 21, taga Wood  Groove  Subdivision sa  Barangay  Gun-ob sa  maong dakbayan.

Si Anagap  miingon si Staff  Sergeant Chrismar Lim sa Presinto  3 sa LLCPO  nga nadestino  sa Traffic  Division naagi  sa maong dapit  dihang nakabantay kini sa kagubot tali sa mga kalalakin-an.

Nagpaila si Lim  sa iyang kaugalingon ngadto sa suspetsado nga giila usab nga mao si Nelson Moradas, 32, taga Sitio Baican sa Barangay Gun-ob sa maong dakbayan.

Apan inay nga motahod, giingong giilog niini ang armas ni Lim hangtud nga nibuto kini ug naigo si Binolirao nga adtong tungora nagsakay og traysikol.

Si Anagap  miingon nga  nadakpan hinuon ang suspetsado nga si Moradas  nga nakuhaan og replica nga kalibre .45  ug kasohan og paglapas sa Republic Act  10591 o  illegal nga paghupot og armas.

Gilahos og dala sa Lapu-Lapu City  Hospital si Binolirao ug gibalhin sa pribadong tambalanan  sa Dakbayan sa Mandaue.

Hinuon si Lim gikatahong misaad nga motabang sa gastos sa pagpatambal kang Binolirao. IBM (BANAT NEWS)