Mamumuno sa Indian national nailhan

CEBU, Philippines — Nailhan na sa kapolsan  sa Presinto 4  sa Lapu-Lapu City  Police  Office (LLCPO)  ang suspetsado  nga nagpusil  patay  sa Indian national  sa Sitio Iba,  Barangay Basak, Dakbayan  sa Lapu-Lapu.

Si  Police Major  Juan Capacio nga maoy hepe sa Presinto 4 sa LLCPO  miingon nga nagpadayon ang ilang pagpangita sa suspetsado sa pagpusil patay  sa biktima nga si Gagandeep Singh, 27, nga nagpuyo sa  Barangay Pajac  sa maong dakbayan.

Matud pa ni Capacionga anG ig-agaw  sa biktima nga nagdumili lamang sa pagpaila maoy mitug-an  ngadto  kanila nga nakadawat  na og mga hulga sa iyang kinabuhi ang namatay sa  wala mahitabo ang maong pagpamusil.

Mitug-an kini nga gikabangi  sa biktima  ang maong gitumbok karon nga mamumuno nga misangpot sa mga pagpanghulga. Apan matud pa nga wala gyud moduol sa kapolisan ang biktima sa pagtuo nga mahusay ra kini kay dili gusto og samok ang namatay kay buot lang niini nga manginabuhi sa maong dapit.

Si Capacio miingon nga ang mamumuno taga diha sa nahitaboan apan misibat na kini.

Dugang pa ni  Capacio nga nagpaabot usab sila nga mopati-aw  sa ilang buhatan ang pipila ka mga nakasaksi sa maong pagpamusil patay  alang sa pagpalig-on sa kaso nga ilang ipasaka batok sa maong mamumuno.

Ang pagpautang og kwarta sa biktima mao gihapon ang gituohang motibo sa pagpatay niini.( /IBM)(BANATNEWS)