Fluvial procession ni Sta. Teresa de Avila karon
CEBU, Philippines — Ang mga pag-uwan-uwan nga nasinati dili makapugong sa himuon nga fluvial procession karong adlawa diin kalabutan kini sa mga kalihukan sa kapistahan sa patrona sa Dakbayan sa Talisay Sta. Teresa de Avila.
Ang kapistahan niini saulogan karong Oktubre 15, 2019.
Si Mikki Aznar, officer-in-charge sa Talisay City Tourism Office nagkanayon nga nabantayan nila ang pag uwan-uwan sa siyudad sa nilabay nga adlaw apan sa ilang pag- obserbar wala kini angay nga kabalak-an.
Matud ni Aznar nga sa kataposan nilang tigom diha sa buhatan ni Bise Mayor Alan Bucao nahan-ay na nila ang tanan alang sa maong kalihukan.
Kagahapon sa hapon gihimo ang Traslacion diin ang imahen ni Sta. Teresa de Avila gidala diha sa Our Lady of Consalacion Parish-Recoletos sa Laray, San Roque, Dakbayan sa Talisay diin anha manukad ang himuong fluvial procession.
Ang imahen ni Sta. Teresa de Avila dalhon kini diha sa Talisay City Fish Port nga nahimutang sa Cebu South Coastal Road sa Sitio Salvador, Barangay Tanke diin anha magsudog ang fluvial procession.
Ang fluvial procession molahos kini diha sa Barangay Pooc dayon balik sa Barangay Poblacion.
Ang mga deboto nga mag-atang diha sa baybayon gipasidan-an nga dili magpabuto o magdala og balloon.
Ang mga deboto giawhag nga magpatugtog sa awit alang kang Sta. Teresa de Avila ug magwara-wara sa banderitas.
Sa nasayran, nikabot ngadto sa 140 ka motor-banca ang gilauman nga mosalmot sa maong kalihukan. (/BDB)(BANATNEWS)
- Latest
