122 kahoy pamutlon
CEBU, Philippines — Moabot sa 122 ka punoan sa mga kahoy kilid sa kadalanan ang maapektahan sa proyekto nga pagpalapad sa kalsada nga himuon sa Department of Public Works and Highways sa Central Visayas (DPWH-7).
Ang maong mga kahoy kinahanglang pamutlon samtang ang uban ibton aron ibalhin sa laing dapit nga gitawag og earthballing.
Si Engineer Edgar Tabacon, Regional Director sa DPWH-7 nagpadala og usa ka sulat kaniadtong Oktubre 3, 2019 sa City Council ug City Environment and Natural Resources Office (Cenro) nga naghangyo og suporta alang sa "Widening Project sa Natalio Bacalso Avenue (Cebu South Road).”
Nasayran nga ang DPWH sa Tree Cutting and Earthballing Permit (TCEP) nga gipagawas kaniadtong Hunyo 23, 2017 sa DENR-CENRO sa maong proyekto.
Apan wala mahinayon ang pagpamutol sa mga kahoy tungod sa mga isyu sa Road Right of Way (RROW). Ang ilang permits pagputol ug earthballing mapaso sud sa 50 ka adlaw gikan sa pag-release niini.
Kini maoy hibungdan nga nipadala pagusab og suwat ang DPWH pag- apply og balik og TCEP. Ang maong suwat tukion pa pagbalik sa konseho.
Giimbitahan sa Cebu City Council ang DPWH-7 alang sa usa ka "Citizen's Hour", nga mahitabo sa Oktubre 15,2019.
Sa "Citizen's Hour," ang DPWH-7 hatagan og oras aron iesplikar ug klaruhon ang mga detalye sa ilang proyekto, lakip ang mga isyu bahin sa pagputol sa 122 nga mga kahoy kun gusto silang hatagan og pagtugot.
Apan daan ng naghisgot si Mayor Edgardo Labella nga dili siya uyon sa pagputol sa mga kahoy sa syudad.
Gani ning bag-ohay lang, gilusad ang ambisyusong tree planting project ni Labella nga ang tumong mao ang pagtanom og tres milyones ka punoan sa mga kahoy sa dakbayan.
Gimandoan ni Labella ang CCENRO ug ang City Engineer sa pagtimbangtimbang sa hangyo sa DPWH-7. (/IBM)(BANATNEWS)
- Latest
