Operasyon sa peryahan ipasuspenso

CEBU, Philippines — Ipasuspenso sa iyang operasyon ang usa ka peryahan human kini nasakpi nga giingong nakahimo og kalapasan sa iyang permit nga gikuha sa Dakbayan sa Talisay.

Si Mayor Gerald Anthony “Samsam” Gullas, Jr. nibutyag nga base sa ilang pakisusi nagpadisko ang tag-iya sa maong peryahan nga gipahimutang diha sa atbang sa Talisay City Hall niadtong nilabay nga  adlaw’ng Sabado dungan sa opening salvo sa kapistahan sa siyudad.

Ug giingong namaligya usab kini og ilimnong makahubog sulod sa peryahan.

Ang pagpadisko ug pagbaligya og ilimnong makahubog ang wala malakip sa gikuha nga permit sa tag-iya sa peryahan hinungdan nga nimando si Gullas sa pagpahamtang niini og silot.

Sa nasayran, si Michael Responso, 25-anyos, taga Barangay Biasong sa maong siyudad ang gipusil patay sa wala pa madakpi nga mamumuno diha sulod sa peryahan.

Ang kapolisan nag-focus sa ilang pagbantay diha sa Talisay City Hall grounds hinungdan nga nabiyaan nila ang peryahan sa pagtuo nga pulos kalingawan nga kalabutang sa perya ang gipahigayon.

Ang operasyon sa maong peryahan suspensohon kini sulod sa duha ka adlaw aron usab kini magmatngon. BDB (BANATNEWS)