Vendors hataganog dugang puhonan

CEBU, Philippines —  Si Mayor Edgardo Labella sa Dakbayan sa Sugbo nipadayag nga angayan usab nga ilhon ang mga sidewalk vendor tungod sa ilang koordinasyon nga gihimo.

Kini human nga ang Dakbayan sa Sugbo nakakuha og dakong grado atol sa gipahigayong inspection sa Department of Interior and Local Government (DILG) diha sa mga sidewalk sa kadalanan. Matud ni Labella nga ang paglimpiyo sa kagamhanan sa siyudad sa mga karsada dili kini magmalamposon kong wala ang kooperasyon ug sakripisyo sa mga mamaligyaay kinsa gipabalhin sa ilang kanhi pwesto.  Si Labella sa iyang pakighinabi sa mga lider sa asosasyon sa mga vendor nibutyag nga ang Department of Labor and Employment (DOLE) mohatag kanila og P20,000 isip dugang nga puhonan.

Ang maong P20, 000 nga pinansiyal nga ihatag sa tanang rehistrado nga vendor sa syudad.

Kalabot sa plano ni Bise Mayor Michael Rama nga ipadangat ang kahimtang sa mga sidewalk vendors ngadto kang Presidente Rodrigo Duterte.

Si Labella nagkanayon nga siya mosupak niini apan kong ang mga vendor mahatagan na og lugar diin sila i-regulate dili na kinahanglan ang plano ni Rama. Gibutyag usab ni Labella nga nahisgutan na niya ang maong sitwasyon ngadto kang Senador Christopher Lawrence “Bong” Go ug Presidential Assistant Michael Lloyd Dino. Nanghinaot si Labella nga mamentinar ang kalimpiyo diha sa mga karsada diin ang gisangonan niini sa pagmentinar ang mga kapitan sa barangay uban sa police station commander.

Ipadayon usab ang pag-monitor sa kadalanan ubos sa kamandoan sa DILG. BDB (BANATNEWS)