Bawal magkasakit

Nagbaha ang paghatag og pasalamat o tribute sa atong mga magtutudlo atol sa usa ka buwan nga pagtimaan sa National Teacher’s Month ilabi na niadtong Oktobre 5 ang culmination o ang World’s Teacher’s Day.

Walay professional kon walay magtutudlo tungod kay sila ang nag-umol sa kinaadman sa matag usa kanato nga nakatunob sa eskwelahan.

Grabe ang pagsakripisyo sa mga teachers aron lang matudloan ang mga tinun-an nga mamahimong mapuslanon nga molupyo sa katilingban.

Apan luyo sa sakripisyo nila ang wala kaayo paghatag kanila og pagtagad o ba kaha nataligam-an sa atong kagamhanan.

Biktima sila sa pasalig sa umento sa suholan nga dugay na nila unta gipaabot nga madawat.

Mas makapahikurat nga bawal diay magkasakit ang mga magtutudlo, tinuod mao ni ang kamatuoran.

Wala diay silay sick leave, dili sama sa uban nga mga ahensya o pribadong kompaniya nga naay 15 days nga sick leave.

Katarungan nga walay sick leave ang mga magtutudlo kay naa kuno silay duha ka buwan nga walay klase panahon sa bakasyon.

Granting ang naasoyng bakasyon apan angayan natong hunahunaon nga ang balatian wala maka eskedyul nga motumaw panahon sa bakasyon lang.

Anytime pwede magkasakit ang tawo og dili exempted ang mga magtutudlo kay tawo usab sila ug dili mga robot nga naka program na.

Busa dunay lakang karon ang ACT Partylist nga mahatagan og 15 ka adlaw nga sick leave ang mga magtutudlo.

Maayo unta kon mahatagan kini og prioridad nga mapasar dili tungod kay espesyal ang magtutudlo kay sila ang nag umol sa atong kaalam apan tungod kay sama nato silang mga tawo nga mobati usab og kakapoy nga simbako mosangpot sa pagkasakit.