Mga luna duol sa Bantayan airport paliton

CEBU, Philippines — Plano sa Kapitolyo nga paliton ang pipila ka luna duol sa Bantayan Airport alang sa tinguha nga pag-develop niini isip commercial airport.

Matud ni Gob. Gwendolyn Garcia nga kinahanglan ang dugang luna aron maugmad ang tugpahanan.

Nakig-alayon na ang Kapitolyo sa kagamhanan sa Lungsod sa Santa Fe nga tapokon ang mga tag-iya sa luna dapit sa airport aron mahinabi mismo sa gobernador.

“I’m planning to return to Sta. We would like to negotiate the possibility of the Province purchasing nearby lots,” matud ni Garcia.

Tinguha sa Kapitolyo nga mapalit ang maong luna sa mosunod nga unom ka buwan. Ang Mactan-Cebu International Airport Authority ug ang Probinsiya sa Sugbo nisulod og kasabutan alang sa pag-develop sa maong tugpahanan lakip na ang pagbalik ngadto sa probinsiya sa pagpanag-iya sa kapin 29 ka ektarya sa maong dapit.

Sa kasabutan, ang MCIAA maoy mo-develop sa maong airport nga gisugdan na niini ang pag-ayo sa terminal ug plano nga pag-develop sa 1.2 ka kilometro nga runway. (Le Phyllis F. Antojado/GMR)

CAMMA awardees gipahalipayan ni Palma

Nipadangat sa iyang pahalipay si Cebu Archbishop Jose Palma sa tanang mananaug sa Catholic Mass Media Awards nga gipahigayon sa Archdiocese of Cebu kagabii.

Ang pasiunang pahalipay giluwatan sa Arsobispo human sa gipahigayon nga Pontifical Mass sa St. Therese Parish sa Lahug, Dakbayan sa Sugbo sa wala pa siya mobiya paingon sa Iloilo kagahapon.

Malaumon ang Arsobispo nga magpadayon gihapon ang mga nakadaug ug wala makadaug nga mahimong inspirasyon sa katawhan ilabi na sa pagsabwag sa respeto ug kamatuoran.

Si Auxiliary Bishop Midyphil Billones ang gikatahasan ni Palma nga makig-uban sa selebrasyon sa CAMMA tungod sa iyang kalihukan sa Iloilo. (/GMR)(BANATNEWS)