Mga batang residente sa OSC nakaeskapo

CEBU, Philippines — Mieskapo ang 11 ka mga residente sa Operation Second Chance sa Barangay Kalunasan sa Dakbayan sa Sugbo ug padayon pa karong gipangita sa mga social workers ug kapulisan sa ilang tagsa-tagsa ka mga pamilya.

Si Konsehal Dave Tumulak, chairman sa Peace and Order sa kagamhanan sa Dakbayan sa Sugbo nga nahinabi sa Banat News miingon nga Biyernes sa gabii atol na unta sa pagpanihapon gihamagan sa mga bata ang house parents nga mopakaon kanila.

Tungod sa kadaghan sa mga bata nakahigayon gyud pag-eskapo ang 20 ka mga bata. Ang siyam niini naapsan ug nabalik sa pasilidad apan ang 11 nakalayo gyud ug padayon pang gipangita.

Giawhag karon ni Tumulak ang mga ginikanan ug pamilya sa mga batang nakaeskapo nga tabangan silang mabalik ang mga bata sa maong facility aron dili sila mag-atubang og laing sumbong.

Ang wala pa nabalik may mga kaso may kalabutan sa illegal nga drugas ug nagpangidaron 15 ngadto sa 17-anyos.

Sa pagkakaron aduna nalay 79 ka mga residente sa maong pasilidad nga gibantayan lang og siyam ka mga house parents.

Si Archbishop Jose Palma sa Archdiocese of Cebu niapelar sa mga ginikanan sa pagpatahan sa mga bata.

Giampo ni Palma nga mahayagan ang mga kabatan-onan sa ilang panghunahuna nga ang pag-eskapo dili sulbad sa ilang problema.

Si Palma niapelar sab sa mga otoridad nga sigurohon nga walay mga dautan nga mahitabo kanila.

Kagahapon sa hapon, giingong nabalik na ang tulo sa mga nieskapo human gi turnover sa ilang mga ginikanan. (/IBM)(BANATNEWS)