Mga sidewalk vendor ipahiluna sa laing lugar

CEBU, Philippines – Napulo ka dalan ug tulo ka major thoroughfare sa Dakbayan sa Sugbo ang dili na mahimong balikan sa pag-ukopar sa mga manindahay human ang Department of Interior and Local Government (DILG) nimando sa pagmentinar sa kalimpiyo niini aron hapsay ang pag-agi sa pedestrian ug mga sakyanan.

Kini ang gibutyag ni Racquel Arce, pangulo sa Prevention Restoration Orderly Beautification Enhancement (PROBE).Matud ni Arce nga sayo pa, gisuspenso una nila ang pagpaninda sa mga manindahay aron mapagamyan ang ilang mga tindahan ug gipasalipod sa mga poste sa pagtuo nga tugotan kini sa DILG apan ang maong ahensiya nimando nga bawion ang dalan aron mabalik kini sa pedestrian. Ang manindahay sa dalan Colon, Osmeña Boulevard ug Natalio Bacalso giingong dili na tugotang makabalik sa maong mga lugar.

Si Arce nagkanayon nga ang mga vendor ipahimutang diha sa lugar nga pwede silang makapaninda.

Sa laing bahin, kagahapon sa buntag nagtapok ang mga manindahay nga apektado sa road clearing diha atubangan sa Plaza Sugbo aron mopadayag sa ilang mga hangyo ug sentimento.  Usa sa mga manindahay diha sa Colon nga si Maricel Gulay nagkanayon nga mo huwat sila hangtud karong Biyernes aron hatagan og kahigayonan ang siyudad sa pakig-alayon niini sa DILG kinsa mohatag og grado sa LGU sa pagtuman sa kamandoan.

Apan human niini hangyuon nila pagbalik ang kagamhanan sa siyudad nga mabalik sila sa ilang pwesto subay sa pasalig ni Mayor Edgardo Labella.

Matud ni Gulay nga masaligon sila nga tumanon sa siyudad ang pasalig niini nga makabalik sila sa ilang pwesto.  Ang kagamhanan sa siyudad nihatag og kahigayonan sa mga sidewalk vendor sa pagpresentar sa ilang sentiment. Samtang si Arce nihimakak sa giingong si Labella nipasalig nga makabalik sa ilang kanhi pwesto ang mga manindahay. (Mary Ruth R. Malinao/BDB)(BANAT NEWS)