Mga kabtangan nga na-disposed bawion sa Kapitolyo

CEBU, Philippines — Gitinguha sa Kapitolyo ang pagbawi sa mga kabtangan niini nga giingong “irregular” ug “illegal” ang pag-dispose sa Probinsiya sa Sugbo.

Si Gobernador Gwendolyn Garcia sa paglingkod niini sa posisyon nimando sa pag-review sa tanang gihimong transaksiyon sa nilabay’ng administrasyon lakip na niini ang pag-dispose sa mga property sa probinsiya.

Matud ni Garcia nga tanang kabtangan nga gibaligya, gidonar, gipahulam o gipaubos sa usufruct sa ubang ahensiya sa gobyerno o entities sa niaging administrasyon kinahanglan matan-aw pagpiho kong niagi ba kini og sakto nga proseso.

Si Bokal John Ismael Borgonia, chairman sa Committee on Provincial and Municipal Properties sa hunta probinsiyal nagkanayon nga nasuta sa maong pakisusi nga ang mga kontrata nga naglangkub sa disposition sa real properties sa probinsiya ngadto sa ubang entities ang walay pagtugot gikan sa Commission on Audit (COA).

Matud pa sa maong resolution nga pag-dispose sa pipila ka properties sa probinsiya kalapasan sa Local Government Code ug COA circular. “In view thereof, there is a need for the Province of Cebu to recover said real properties”, tipik sa resolusyon nga gipangamahan ni Borgonia. (/BDB)(BANATNEWS)